ലോകത്തെ ഏറ്റവും മികച്ച 50 ചിക്കൻ വിഭവങ്ങളുടെ പട്ടിക പുറത്ത് വിട്ടതോടെ, സോഷ്യൽ മീഡിയിൽ പോര് കടുക്കുന്നു. ചിക്കൻ ടിക്ക മസാലയെ യുകെ വിഭവമെന്ന രീതിയിൽ പട്ടികയിൽ ഇടം നേടിയതാണ് ആശയക്കുഴപ്പങ്ങൾക്ക് തിരിതെളിച്ചത്. ഇന്ത്യയിൽ നിന്നും തന്തൂരി ചിക്കൻ, ബട്ടർ ചിക്കൻ, ടിക്ക, ചിക്കൻ 65 എന്നിവ ഇടം നേടിയപ്പോൾ, യുകെ വിഭവമെന്ന നിലയിലാണ് ചിക്കൻ ടിക്ക പട്ടികയിൽ ഇടം നേടിയത്.
പട്ടിക പുറത്ത് വന്നതോടെ, ചിക്കൻ ടിക്ക ബ്രിട്ടീഷ് വിഭവമല്ലെന്നും ഇന്ത്യയുടേത് ആണെന്നും ചൂണ്ടിക്കാട്ടി നിരവധി പേരാണ് രംഗത്ത് എത്തിയത്. എന്നാൽ, വിഭവം ഉടലെടുത്തത് യുകെയിലാണെന്നും എങ്കിലും ഏഷ്യൻ വംശജരാണ് അത് ഉണ്ടാക്കിയതെന്നും വാദിച്ച് മറ്റൊരു വിഭാഗം രംഗത്തെത്തിയിട്ടുണ്ട്. അതേസമയം, യുകെയിലെ ഗ്ലാസ്‌ഗോ ആസ്ഥാനമായി പ്രവർത്തിച്ച അലി അഹമ്മദ് അസ്‌ലം എന്ന ഷെഫാണ് ചിക്കൻ ടിക്ക മസാലയുടെ സ്രഷ്ടാവെന്ന് അറിയപ്പെടുന്നത്.
1970കളിലാണ് ചിക്കൻ ടിക്ക മസാലയുടെ ജനനം എന്നാണ് പറയപ്പെടുന്നത്. ചിക്കൻ ടിക്കയിൽ എരിവില്ലാത്ത ഒരു സോസ് കൂടി ഉണ്ടായാൽ നന്നാകുമെന്ന ഒരു ഉപഭോക്താവിന്റെ പരാതിയോടെയാണ് അലി അഹമ്മദ് അസ്‌ലം ചിക്കൻ ടിക്ക മസാലക്ക് രൂപം കൊടുത്തത്. യോഗർട്ട്, ക്രീം, മസാലകൾ എന്നിവ ഉൾപ്പെട്ടെ സോസ് കൂടി ഇതിനൊപ്പം ചേർത്തപ്പോൾ ചിക്കൻ ടിക്ക മസാല വൻ ഹിറ്റായി മാറുകയായിരുന്നു.
പാകിസ്താനിലെ പഞ്ചാബ് പ്രവിശ്യയിലാണ് അലി അഹമ്മദ് അസ്‌ലമിന്റെ ജനനം. എന്നാൽ, കുട്ടിയായിരിക്കുമ്പോൾ തന്നെ ഇവർ സ്‌കോട്‌ലാൻഡിലേയ്ക്ക് കുടിയേറുകയായിരുന്നു. എന്നാൽ, യുകെയിലെ മറ്റ് ചില റെസ്‌റ്റോറന്റുകളും ചിക്കൻ ടിക്ക മസാല തങ്ങളുടേതെന്ന വാദം ഉന്നയിക്കുന്നുണ്ട്.
Discussion about this post