മതനിന്ദയാരോപിച്ച് ബംഗ്ലാദേശിൽ 15കാരനായ ഹിന്ദുബാലനെ പോലീസ് സ്‌റ്റേഷനിൽ വച്ച് ആൾക്കൂട്ടം വെട്ടിക്കൊന്നു

ധാക്ക: മതനിന്ദ ആരോപിച്ച് ബംഗ്ലാദേശിൽ 15 കാരനെ വെട്ടിക്കൊന്നു. പ്രവാചകൻ മുഹമ്മദ് നബിയെ കുറിച്ച് സോഷ്യൽമീഡിയയിൽ അധിക്ഷേപകരമായ കമന്റ് ചെയ്‌തെന്നാരോപിച്ചാണ് 15 കാരനെ ആൾക്കൂട്ടം പ്രകോപിതരായി വെട്ടിക്കൊന്നത്. ഉത്സവ് മണ്ഡോൾ എന്നാണ് കൊല്ലപ്പെട്ട കുട്ടിയുടെ പേര്

ഖുൽനയ്ക്ക് അടുത്തുള്ള സോനാഡംഗയിലാണ് സംഭവം. കുട്ടിയെ പ്രവാചകനിന്ദ ആരോപിച്ച് പോലീസ് കസ്റ്റഡിയിലെടുത്തിരുന്നു. പോലീസ് സ്റ്റേഷനിലെത്തിയാണ് ആൾകൂട്ടം കുട്ടിയെ കൊലപ്പെടുത്തിയത്.ബംഗ്ലാദേശിലെ ആർമി ഉദ്യോഗസ്ഥരുടെ ഉൾപ്പെടെ സാന്നിധ്യത്തിലാണ് ക്രൂരമായ ആൾക്കൂട്ട കൊലപാതകം നടന്നതെന്നാണ് റിപ്പോർട്ടുകൾബംഗ്ലാദേശിലെ ന്യൂനപക്ഷങ്ങളുടെ അവകാശങ്ങൾക്കായി പ്രവർത്തിക്കുന്ന ബംഗ്ലാദേശ് മൈനോരിറ്റീസ് ഹ്യൂമൻ റൈറ്റ്സ് കോൺഗ്രസ് എക്സിലൂടെയാണ് സംഭവം അറിയിച്ചത്.

ബംഗ്ലാദേശിൽ ന്യൂനപക്ഷമായ ഹിന്ദുക്കൾക്ക് നേരെ നിരന്തരം ആക്രമണങ്ങൾ നടക്കുന്നതായി ചില അതിശയോക്തി കലർന്ന വാർത്തകളാണ് പുറത്ത് പ്രചരിക്കുന്നതെന്ന് ഇടക്കാല ഗവൺമെന്റിന്റെ മുഖ്യ ഉപദേഷ്ടാവ് മുഹമ്മദ് യൂനുസ് പറഞ്ഞതിന് പിന്നാലെയാണ് കൊലപാതക വാർത്ത പുറത്ത് വന്നിരിക്കുന്നത്.