ഇതെന്തൊരു പോക്കാണ്; റെക്കോർഡിൽ സ്വർണവില

തിരുവനന്തപുരം : സംസ്ഥാനത്ത് സ്വർണവില റെക്കോർഡുകൾ മറികടന്നു കൊണ്ടിരിക്കുകയാണ്. ഇന്ന് പവന് 160 രൂപ വർദ്ധിച്ചു. ഇതോടെ സ്വർണവില ആദ്യമായി 56,000ലേക്ക് എത്തി. ഒരു പവൻ സ്വർണത്തിന്റെ ഇന്നത്തെ വില 56,000 രൂപയാണ്. കഴിഞ്ഞ ദിവസം 55,840 രൂപയായിരുന്നു.

ഇന്ന് ഒരു ഗ്രാമിന് 20 രൂപയാണ് വർദ്ധിച്ചത്. 7,000 രൂപയാണ് ഒരു ഗ്രാം സ്വർണത്തിന്റെ വില. കഴിഞ്ഞ ദിവസം ഒരു ഗ്രാമിന് 6 ,980 രൂപയായിരുന്നു. ഈ മാസത്തിന്റെ തുടക്കത്തിൽ 53,360 രൂപയായിരുന്നു സ്വർണവില. പടിപടി ഉയർന്ന സ്വർണവില സെപ്റ്റംബർ 16നാണ് വീണ്ടും 55,000 കടന്നത്.

കഴിഞ്ഞ ദിവസം യുഎസ് ഫെഡറൽ റിസർവ് പലിശ നിരക്ക് കുറച്ചതോടെ സ്വർണവില വർദ്ധിക്കുമെന്ന് നിരീക്ഷണങ്ങളുണ്ടായിരുന്നു. ഇതിന് പിന്നാലെയാണ് ഇന്നലെയും ഇന്നുമായി സ്വർണവില ഉയരങ്ങളിലേക്ക് കുതിച്ചുകയറുന്നത്.