ഓമനിക്കുന്നതിനിടയില് ഉടമയുടെ ചെവി പിറ്റ്ബുള് കടിച്ചു പറിച്ചു. ഉടമയായ 22കാരനാണ് ഈ ദുര്വിധി നേരിട്ടത്. പിന്നാലെ ് 11 മണിക്കൂര് നിണ്ട ശസ്ത്രക്രിയയിലൂടെ ഇയാളുടെ ചെവി ഡോക്ടര്മാര് തിരികെ തുന്നിച്ചേര്ത്തു. ദില്ലിയിലെ സ്വകാര്യ ആശുപത്രിയിലാണ് ശസ്ത്രക്രിയ നടന്നത്. നായ കടിച്ച് പറിച്ചതോടെ ചെവി ശരീരത്തില് നിന്ന് 2 മില്ലി മീറ്റര് ത്വക്കില് തൂങ്ങിക്കിടക്കുന്ന നിലയിലാണ് 22കാരന് ചികിത്സ തേടിയെത്തിയത്.
ഇന്ട്രിക്കറ്റ് മൈക്രോ സര്ജിക്കല് റീ പ്ലാന്റേഷന് എന്ന നടപടിയിലൂടെയാണ് ആരോഗ്യ വിദഗ്ധര് ചെവി തിരികെ തുന്നിച്ചേര്ത്തത്. ചെവി തിരികെ വെറുതെ തുന്നിച്ചേര്ക്കുകയായിരുന്നില്ല ഇവര് ചെയ്തത് പുറത്ത് നിന്നുള്ള കാഴ്ചയില് യാതൊരു വിധ വ്യത്യാസം വരാത്ത രീതിയിലാണ് ചെവി തിരികെ സ്ഥാപിച്ചതെന്നാണ് റിപ്പോര്ട്ടുകള് പറയുന്നത്.പിറ്റ്ബുള്ളിന്റെ ആക്രമണത്തിന് പിന്നാലെ തന്നെ ആശുപത്രിയിലെത്തിയ യുവാവിന്റെ ചെവിയിലേക്കുള്ള രക്തചംക്രമണം പുനസ്ഥാപിക്കാന് ആയതാണ് ശസ്ത്രക്രിയയ്ക്ക് പ്രതീക്ഷ നല്കിയതെന്നാണ് ഡോക്ടര്മാര് വിശദമാക്കിയത്. വലിച്ച് കീറിയ നിലയിലായിരുന്നു ചെവിയിലേക്കുള്ള രക്തക്കുഴല്.
എന്നാല് തീരെ ചെറിയ 0.5 മില്ലിമീറ്ററോളം മാത്രം വലിപ്പമുള്ള ഈ രക്തക്കുഴല് പുനസ്ഥാപിക്കുക എന്നതായിരുന്നു ശസ്ത്രക്രിയയിലെ ഏറ്റവും ദീര്ഘവും വെല്ലുവിളി നിറഞ്ഞതുമായിരുന്ന ഘട്ടമായിരുന്നുവെന്നാണ് പ്ലാസ്റ്റിക് സര്ജറിക്ക് നേതൃത്വം നല്കിയ ഡോ മോഹിത് ശര്മ്മ വിശദമാക്കുന്നത്. വലിയ ശക്തിയേറിയ മൈക്രോ സ്കോപ്പുകളുടേയും സൂപ്പര് മൈക്രോ സര്ജിക്കല് ഉപകരണങ്ങളുടേയും സഹായത്തോടെ ആയിരുന്നു ശസ്ത്രക്രിയയെന്നും മോഹിത് ശര്മ്മ വിശദമാക്കി.
