തന്റെ പതിവ് മലകയറ്റത്തിനിടയില്‍ ബിഗ്ഫൂട്ടിനെ നേരിട്ട് കണ്ടെന്ന ഒരു സഞ്ചാരിയുടെ വെളിപ്പെടുത്തല്‍ വൈറലാകുന്നു. ഓക്‌ലഹോമയിലെ പാരലല്‍ ഫോറസ്റ്റിലാണ് ബിഗ്ഫൂട്ടിനെ കണ്ടതായി ടിക്‌ടോക്കര്‍ കൂടിയായ സഞ്ചാരി അവകാശപ്പെടുന്നത്.; അത് ഭീകരമായ ഒരു കാഴ്ചയായിരുന്നുവെന്നും ഒന്‍പത് സെക്കന്റ് മാത്രം ദൈര്‍ഘ്യമുള്ള വിഡിയോ പങ്കുവച്ചുകൊണ്ട് ഇദ്ദേഹം കുറിച്ചു. ഇദ്ദേഹം പങ്കുവെച്ച ദൃശ്യങ്ങള്‍ പക്ഷേ അത്ര വ്യക്തതയുള്ളതല്ല.
‘ബിഗ്ഫൂട്ട് കാമറയില്‍ പതിഞ്ഞുവെന്നാണ് കരുതുന്നത്. ജീവിതത്തിലെ ഏറ്റവും ഭീതിദമായ നിമിഷം. വെറുതേ കാഴ്ച കാണാന്‍ ഇറങ്ങിയപ്പോഴാണ് വിദൂരത്ത് നിന്നും ഈ ദൃശ്യം കണ്ണില്‍പ്പെട്ടതെന്നും ആ കാഴ്ചയുടെ നടുക്കവും വിറയലും ഇതുവരെയും മാറിയിട്ടില്ലെ’ന്നും വിഡിയോയ്ക്ക് ഒപ്പമുള്ള കുറിപ്പില്‍ പറയുന്നു.
രോമാവൃതമായ വലിയ കാലുകളോട് കൂടിയ ജീവിയെ വിഡിയോയില്‍ കാണാം. ഒറ്റക്കാഴ്ചയില്‍ ആള്‍ക്കുരങ്ങെന്ന് തോന്നുമെങ്കിലും അസാമാന്യ വലിപ്പവും മനുഷ്യന്റേത് പോലെയുള്ള നടത്തവുമാണ് വിഡിയോയിലെ ജീവിക്കുള്ളത്. ദേവദാരു മരങ്ങള്‍ക്കിടയിലൂടെ നടക്കുന്ന ബിഗ്ഫൂട്ടിനെ കാണാം.
എന്നാല്‍ ഈ വിഡിയോ വ്യാജമാണെന്നും ആളുകളെ തെറ്റിദ്ധരിപ്പിക്കുന്നതാണെന്നും നിരവധിപ്പേര്‍ കമന്റ് ചെയ്തു. 1987ലെ ‘ഹാരി ആന്റ് ഹെന്‍ഡേഴ്‌സന്‍’ എന്ന സിനിമ പോലെയുണ്ടെന്നായിരുന്നു ഒരാള്‍ കുറിച്ചത്. ഇത് ആരോ വേഷം കെട്ടിയതാണെന്നും മസിലിന്റെയോ അസ്ഥികളുടെയോ ചലനങ്ങളൊന്നും തന്നെ ഈ ജീവിയില്‍ കാണാനില്ലെന്നും കമന്റുകള്‍ പറയുന്നു.
Discussion about this post