കോഴിക്കോട് : കോഴിക്കോട് അടിവാരത്ത് അപ്രതീക്ഷിത മലവെള്ളപ്പാച്ചിൽ. മലവെള്ളപ്പാച്ചിലിൽ പെട്ട് ഒരു യുവതി മരിച്ചു. തോട്ടിൽ അലക്കി കൊണ്ടിരിക്കെ മലവെള്ളപ്പാച്ചിലിൽ ഒഴുകി പോവുകയായിരുന്നു.
അടിവാരം പൊട്ടികൈയിൽ തോട്ടിൽ അലക്കിക്കൊണ്ടിരിക്കുന്നതിനിടയിലാണ് യുവതി ഒഴുക്കിൽപ്പെട്ടത്. അടിവാരം കിളിയൻകോടൻ വീട്ടിൽ സജ്നയാണ് മരിച്ചത്. സജ്നയോടൊപ്പം ഉണ്ടായിരുന്ന മറ്റൊരു യുവതിക്ക് പരിക്കേറ്റിട്ടുണ്ട്.
കൂടെയുണ്ടായിരുന്ന യുവതിയാണ് സജ്ന ഒഴുക്കിൽപ്പെട്ടതായി നാട്ടുകാരെ വിളിച്ച് അറിയിച്ചത്. തുടർന്ന് നാട്ടുകാരുടെ നേതൃത്വത്തിൽ സമീപപ്രദേശങ്ങളിൽ തിരച്ചിൽ നടത്തിയിരുന്നു. ഏറെ സമയത്തെ തിരച്ചിലിന് ശേഷം മൂന്ന് കിലോമീറ്റർ അപ്പുറത്തുനിന്നും ആണ് സജ്നയുടെ മൃതദേഹം കണ്ടെത്തിയത്.
