ന്യൂഡൽഹി: ഗുണ്ടാനേതാവ് ലോറൻസ് ബിഷ്ണോയി സംഘത്തിലെ ഏഴ് ഷാർപ്പ് ഷൂട്ടർമാർ അറസ്റ്റിൽ. ബോളിവുഡ് താരം സൽമാൻ ഖാന്റെ മുംബൈയിലെ വസതിക്ക് നേരെയുണ്ടായ വെടിവെയ്പ്പുമായും മഹാരാഷ്ട്ര മുൻ മന്ത്രി ബാബ സിദ്ദിഖിയുടെ കൊലപാതകവുമായും ബന്ധമുള്ളവരാണ് അറസ്റ്റിലായത്. പഞ്ചാബ്, ഹരിയാന, രാജസ്ഥാൻ, ഡൽഹി എന്നിവിടങ്ങളിൽ നിന്നായാണ് ഏഴ് പേരെയും പിടികൂടിയത്. കഴിഞ്ഞ 48 മണിക്കൂറിനുള്ളിലാണ് ഏഴ് പേരും പിടിയിലായതെന്നാണ് റിപ്പോർട്ടുകൾ.
ഡൽഹി പോലീസിന്റെ സ്പെഷ്യൽ സെൽ നടത്തിയ പരിശോധനയിൽ ആറ് സെമി ഓട്ടോമാറ്റിക് ആയുധങ്ങളും വെടിക്കോപ്പുകളും പിടിച്ചെടുത്തിട്ടുണ്ട്. ബാബ സിദ്ദിഖിയുടെ കൊലപാതകത്തെ കുറിച്ചും ലോറൻസ് ബിഷ്ണോയി സംഘത്തിന്റെ മറ്റ് പ്രവർത്തനങ്ങളെ കുറിച്ചും ചോദ്യം ചെയ്തുവരികയാണ്. ലോറൻസ് ബിഷ്ണോയി സംഘത്തിലെ ഷൂട്ടർമാരിൽ ആദ്യത്തെ അറസ്റ്റ് ബുധനാഴ്ച ഹരിയാനയിൽ നിന്നാണ് നടക്കുന്നത്. ബാബാ സിദ്ദിഖി കൊലപാതകം, സൽമാൻ ഖാന് നേരെയുള്ള വെടിവെയ്പ്പ്, പഞ്ചാബി ഗായകൻ സിദ്ധു മൂസ്വാലയുടെ കൊലപാതകം എന്നീ സംഭവങ്ങൾ ഗുജറാത്തിലെ സബർമതി ജയിലിൽ ഇരുന്നുകൊണ്ടുള്ള ലോറൻസ് ബിഷ്ണോയി പരന്നുകിടക്കുന്ന ക്രിമിനൽ സിൻഡിക്കേറ്റിലെ ഒരു ചെറിയ ഭാഗം മാത്രമാണ്.
കുപ്രസിദ്ധ അധോലോകനേതാവ് ലോറൻസ് ബിഷ്ണോയിയുടെ സഹോദരൻ അൻമോൾ ബിഷ്ണോയിയെ പിടികൂടുന്നയാൾക്ക് 10 ലക്ഷം രൂപ എൻഐഎ പാരിതോഷികം പ്രഖ്യാപിച്ചിരുന്നു. അൻമോൾ ബിഷ്ണോയിയുടെ പേരും എൻഐഎ പിടികിട്ടാപ്പുള്ളികളുടെ പട്ടികയിൽ ചേർത്തു. ബോളിവുഡ് താരം സൽമാൻ ഖാന്റെ വീടിന് നേരെയുണ്ടായ വെടിവെയ്പ്പുമായി ബന്ധപ്പെട്ടാണ് അൻമോൾ ബിഷ്ണോയിയെ എൻഎഎ തിരയുന്നത്.
കേസുമായി ബന്ധപ്പെട്ട് നിലവിൽ അഞ്ച് പേർ മുംബൈ പോലീസിന്റെ കസ്റ്റഡിയിലാണ്. സൽമാൻ ഖാന്റെ അടുത്ത സുഹൃത്തും മഹാരാഷ്ട്ര മുൻ മന്ത്രിയുമായ ബാബ സിദ്ദിഖിയുടെ കൊലപാതകത്തിലും അൻമോൾ ബിഷ്ണോയിക്ക് പങ്കുണ്ടെന്നാണ് അന്വേഷണസംഘം വിലയിരുത്തുന്നത്.
ലോറൻസ് ബിഷ്ണോയിയുടെ സംഘമാണ് സൽമാൻ ഖാന്റെ വസതിക്ക് നേരെ വെടിവെയ്പ്പ് നടത്തിയത്. ഈ സംഭവത്തിന്റെ ഉത്തരവാദിത്വം ഏറ്റെടുത്ത് അൻമോൾ ബിഷ്ണോയി രംഗത്തെത്തിയിരുന്നു. ഫേസ്ബുക്ക് കുറിപ്പിലായിരുന്നു ഇയാൾ ഇക്കാര്യം വെളിപ്പെടുത്തി രംഗത്തെത്തിയത്. അൻമോൾ ബിഷ്ണോയി നിലവിൽ കാനഡയിലാണെന്നാണ് അന്വേഷണ സംഘം സംശയിക്കുന്നത്. പഞ്ചാബി ഗായകൻ സിദ്ദു മുസ്വാലയെ കൊലപ്പെടുത്തിയ കേസുകളിൽ ഉൾപ്പെടെ 18ഓളം കേസുകളിൽ പ്രതിയാണ് ഇയാൾ.
