ചൂട് കാലം ഇതാ പടിവാതിൽക്കൽ എത്തിനിൽക്കുകയാണ്. കുറച്ചുദിവസങ്ങൾക്കുള്ളിൽ താപനില കടുത്ത് നമുക്ക് കുടിയില്ലാതെ പുറത്തിറങ്ങാൻ കഴിയാതെ വരും. ഈ സാഹചര്യത്തിൽ നമ്മൾ ഒട്ടേറെ കാര്യങ്ങൾ ശ്രദ്ധിക്കേണ്ടതുണ്ട്. അതിലൊന്നാണ് വിയർപ്പ്. ചൂടും പൊടിയും കാരണം പലർക്കും നല്ല ശരീരദുർഗന്ധമാണ് ഉണ്ടാവുക. ഇത് പലപ്പോഴും പൊതുഇടങ്ങളിൽ ബുദ്ധിമുട്ടുണ്ടാക്കുന്നു.
ശരീരം അമിതമായി ചൂടാകുന്നത് മൂലമുണ്ടാകുന്ന അപകടങ്ങൾ ഒഴിവാക്കാനാണ് ചർമത്തിലെ വിയർപ്പുഗ്രന്ഥികൾ(അപ്പോക്രിൻ, എക്രിൻ ഗ്രന്ഥികൾ) കൂടുതൽ വിയർപ്പ് ഉത്പാദിപ്പിക്കുന്നത്. ഈ വിയർപ്പ് ബാഷ്പീകരിക്കാനായി കൂടുതൽ താപം ഉപയോഗിക്കപ്പെടുമ്പോൾ ശരീരം തണുക്കുന്നു. അതുകൊണ്ട് ഈ വിയർപ്പൊരു ശല്ല്യക്കാരനല്ല എന്ന് മനസ്സിലാക്കുക. സത്യത്തിൽ വിയർപ്പിന് ഒരു ഗന്ധവുമില്ല എന്നതാണ് യാഥാർത്ഥ്യം. ജലവും ലവണങ്ങളുമടങ്ങിയ വിയർപ്പ് ചർമോപരിതലത്തിൽ വ്യാപിച്ച് നനഞ്ഞ് അവിടെയുള്ള അഴുക്കും അണുക്കളുമായി പ്രവർത്തിക്കുമ്പോൾ മാത്രമാണ് ദുർഗന്ധമുണ്ടാകുന്നത്.
നൈലോൺ, പോളിസ്റ്റർ എന്നിവയുപയോഗിച്ച് നിർമ്മിച്ച വസ്ത്രങ്ങൾ ഒഴിവാക്കു, കോട്ടൺ വസ്ത്രങ്ങൾ മാത്രം ധരിക്കുക. ഗുണമേന്മയുള്ള കോട്ടൺ തുണികൾ ഉപയോഗിച്ച് നിർമ്മിച്ച അടിവസ്ത്രങ്ങൾ ഉപയോഗിക്കുക. ഇത് ശരീരത്തിലെ വിയർപ്പിനെ വലിച്ചെടുത്ത് ബാഷ്പീകരണം എളുപ്പത്തിലാക്കുന്നു. ശരീരത്തിൽ വെള്ളം കുടൂതലുണ്ടെങ്കിൽ ശരീര താപനില കുറയ്ക്കാൻ സഹായിക്കും. അതുവഴി വിയർപ്പിന്റെ അളവും നിയന്ത്രിക്കാം.വെളുത്തുള്ളി,സവാള എന്നിവ കഴിവതും ഒഴിവാക്കുക. മാംസാഹാരങ്ങൾ കുറയ്ക്കുക.സോഡ,കാപ്പി,ചായ എന്നിവ അധികം ഉപയോഗിക്കുന്നവരിലും ദുർഗന്ധം ഉണ്ടാകാൻ സാധ്യത കൂടുതലാണ്.വറുത്തതും,പൊരിച്ചതും കൊഴുപ്പ് ഏറിയതുമായ ആഹാരപദാർത്ഥങ്ങൾ ഒഴിവാക്കുക.വേനൽകാലത്ത് ഫ്രഷ്നെസ് തോന്നിക്കാൻ ഐസ് വാട്ടർ സ്പ്രേ ഉപയോഗിക്കാം. വീട്ടിൽ നിന്ന് പുറത്തിറങ്ങുമ്പോൾ ഒരു ബോട്ടിലിൽ ഐസ് വെള്ളം കരുതാം. കൂടുതലായി ചൂടു തോന്നുമ്പോൾ ഇത് ശരീരത്തിൽ സ്പ്രേ ചെയ്യാവുന്നതാണ്. ഇത് വിയർപ്പിന്റെ അളവ് കുറയ്ക്കും.
വേനൽക്കാലത്ത് സാധാരണ ടാൽക്കം പൗഡറുകൾക്ക് പകരം ആന്റിപെർസ്പിറന്റ് ക്രീമുകളോ പൗഡറുകളോ ഉപയോഗിക്കാം.മഞ്ഞൾ ബാക്ടീരിയ, ഫംഗസ് എന്നിവയ്ക്കെതിരെ പ്രവർത്തിയ്ക്കുന്നവയാണ്. ആഴ്ചയിലൊരു തവണയെങ്കിലും മഞ്ഞൾ തേച്ച് കുളി ശീലമാക്കിയാൽ അമിത വിയർപ്പ് ഗന്ധം നിയന്ത്രിക്കാം. മഞ്ഞൾ അരച്ച് ദേഹത്ത് പുരട്ടി കുളിക്കുക.കുളിയ്ക്കുന്ന വെള്ളത്തിൽ അൽപം മഞ്ഞൾ കലർത്താം.റോസ് വാട്ടർ അഥവാ പനിനീര് നല്ലൊരു പരിഹാരമാണ്. വെള്ളത്തിൽ റോസ് വാട്ടർ ഒഴിച്ച് കുളിക്കുന്നത് ദുർഗന്ധം ഒഴിവാക്കാൻ നല്ലതാണ്. വെള്ളത്തിൽ നാരങ്ങാനീരും റോസ് വാട്ടറും ചേർത്ത് കുളിക്കുന്നത് തലമുടിയിലെ ദുർഗന്ധം അകറ്റാനും സഹായിക്കും.
