റിയാദ്: സൗദി അറേബ്യയില്‍ വധശിക്ഷക്ക് വിധിക്കപ്പെട്ട് 18 വര്‍ഷമായി സൗദി ജയിലില്‍ കഴിയുന്ന കോഴിക്കോട് കോടമ്പുഴ സ്വദേശി അബ്ദുൽ റഹീമിന്റെ മോചന ഉത്തരവ് ഇന്ന് ഇറങ്ങിയേക്കും. റിയാദ് കോടതി ഇന്ന് കേസ് പരിഗണിക്കും. അബ്ദുൽ റഹീമിന്റെ വധശിക്ഷ കോടതി നേരത്തെ റദ്ദ് ചെയ്തിരുന്നു. ബ്ലഡ് മണിയുടെ ചെക്കും രേഖകളും കോടതിയിലെത്തിച്ചതോടെ മോചനത്തിനായുള്ള നടപടിക്രമങ്ങളെല്ലാം പൂർത്തിയായിരുന്നു.
ഇനി മോചന ഉത്തരവിൽ കോടതി ഒപ്പ് വച്ചാൽ അബ്ദുൽ റഹീമിന് ജയിൽ വാസത്തിൽ നിന്നും മോചനമാകും. റഹീമിന്റെ മോചത്തിനായി സമാഹരിച്ച ഫണ്ടില്‍ ബാക്കിയുള്ള പതിനൊന്നരക്കോടി രൂപ മറ്റ് ജീവകാരുണ്യ പ്രവര്‍ത്തനങ്ങള്‍ക്ക് ഉപയോഗിക്കാൻ ധാരണയായിട്ടുണ്ട്. റഹീമിന്റെ അഭിപ്രായം കൂടി കേട്ട ശേഷം ഇക്കാര്യത്തില്‍ അന്തിമ തീരുമാനമെടുക്കുമെന്ന് നിയമ സഹായ സമിതി വ്യക്തമാക്കി.
റഹീമിന്റെ മോചനത്തിനായി 47,87,65347 രൂപയാണ് ആകെ സമാഹരിച്ചതെന്ന് നിയമ സഹായ സമിതി അറിയിച്ചു. ദിയ ധനം ഉൾപ്പെടെയുള്ള ചെലവ് 36,27, 34,927 രൂപയാണ്. ബാക്കി 11, 60, 30,420 രൂപ ട്രസ്റ്റ് അക്കൗണ്ടിൽ ഉണ്ട്. ഈ തുക എന്ത് ചെയ്യണമെന്ന് റഹീം നാട്ടിൽ തിരിച്ചെത്തിയ ശേഷം യോഗം ചേർന്ന് തീരുമാനിക്കുമെന്നും സമിതി അറിയിച്ചു.
Discussion about this post