മലപ്പുറം: സ്വർണകവർച്ച കേസിൽ വയലിനിസ്റ്റ് ബാലഭാസ്കറിന്റെ ഡ്രൈവർ അർജുന് അറസ്റ്റിലായ സംഭവത്തിന് ബാലഭാസ്കറിന്റെ മരണ കേസുമായി ബന്ധമില്ലെന്ന് പോലീസ്. അതുകൊണ്ട് തന്നെ ആ ദിശയില് അന്വേഷണം നടത്തേണ്ട ആവശ്യമില്ലെന്ന നിലപാടിലാണ് പോലീസ്.
പെരിന്തൽമണ്ണയിലെ ജ്വല്ലറി ഉടമയെ കാറിടിച്ച് വീഴ്ത്തി സ്വർണം തട്ടിയ കേസിലാണ് അർജുൻ കഴിഞ്ഞ ദിവസം അറസ്റ്റിലായത്. ബാലഭാസ്കറിന്റെ മരണത്തിന് ഇടയായ വാഹനാപകടം ഉണ്ടായപ്പോൾ കാർ ഓടിച്ചിരുന്നത് അർജുൻ ആണ്. അർജുന് പുറമേ 12 പ്രതികൾ കൂടി കേസിൽ ഉൾപ്പെട്ടിട്ടുണ്ട്. ജ്വല്ലറി ഉടമയിൽ നിന്നും മൂന്നര കിലോ സ്വർണം ആണ് അർജുൻ ഉൾപ്പെട്ട സംഘം തട്ടിയെടുത്തത്. ഇതിൽ 2.2 കിലോ സ്വർണവും ബാക്കി സ്വർണം വിറ്റുകിട്ടിയ പണവും പോലീസ് കണ്ടെടുത്തു.
പെരിന്തൽമണ്ണ ഡിവൈഎസ്പി ടി കെ ഷൈജുവിനെ നേതൃത്വത്തിലുള്ള അന്വേഷണസംഘമാണ് സ്വർണ്ണവും പണവും കണ്ടെടുത്തത്. ഇയാളെ വിശദമായി ചോദ്യം ചെയ്യുകയാണ്. പെരിന്തൽമണ്ണയിൽ സ്വർണം തട്ടിയ സംഘത്തെ ചെർപ്പുളശ്ശേരിയിലെത്തി മറ്റൊരു കാറിൽ കൂട്ടിക്കൊണ്ടുപോയത് അർജ്ജുനാണെന്നാണ് വിവരം.
ബാലഭാസ്കറിന്റെ മരണത്തിന് സ്വർണ്ണക്കടത്തുമായി ബന്ധമുണ്ടെന്ന് കുടുംബവും സുഹൃത്തുക്കളും നേരത്തെ ആരോപിച്ചിരുന്നു. ഇതിനിടെയാണ് അർജുൻ സ്വർണ്ണക്കവർച്ച കേസിൽ അറസ്റ്റിലാവുന്നത്.
