ജോലിസ്ഥലത്തെ ചൂഷണങ്ങള്‍ എന്നും ചർച്ചയാവാറുണ്ട്. പ്രത്യേകിച്ചും തുടക്കക്കാരും സ്ത്രീകളും തൊഴിലിടങ്ങളില്‍ നിരവധി പ്രശ്നങ്ങള്‍ നേരിടാറുണ്ട്. അത്തരത്തിലൊരു യുവാവിന്റെ അനുഭവം ആണ് ഇപ്പോൾ സോഷ്യല്‍ മീഡിയയില്‍ ചർച്ചയാവുന്നത്.
സോഷ്യല്‍ മീഡിയ പ്ലാറ്റ്ഫോം ആയ റെഡ്ഡിറ്റിൽ ആണ് യുവാവ് തന്റെ അനുഭവം പങ്കുവച്ചത്‌. ആറ് മാസത്തെ ഇൻ്റേൺഷിപ്പ് എക്സ്പീരിയൻസുള്ള ഡെവലപ്പർ ആണ് യുവാവ്. ഒരു ഫ്രണ്ട്എൻഡ് ഡെവലപ്പറായിട്ടാണ് ഒരു സ്റ്റാർട്ടപ്പിൽ താന്‍ ജോലിക്ക് കയറിയതെന്ന് യുവാവ് പറയുന്നു. എന്നാൽ, ജോലിക്ക് കയറി കുറച്ച് നാള്‍ക്കുള്ളില്‍ തന്നെ തനിക്ക് പറഞ്ഞിരിക്കുന്ന ജോലി മാത്രമല്ല താൻ ചെയ്യേണ്ടത് എന്ന് മനസിലായി.
ഈ മേഖലയിൽ മുൻപരിചയമുണ്ടായിരുന്നില്ലെങ്കിലും അത് പഠിച്ചെടുക്കാനും ചെയ്യാനും താന്‍ ഒരുക്കമായിരുന്നുവെന്ന് യുവാവ് പറയുന്നു. പക്ഷേ, അധികം വൈകാതെ തന്നെ അമിതമായ ജോലിഭാരമാണ് തന്റെ ചുമലിൽ വന്നുവീണത് എന്നും പോസ്റ്റില്‍ യുവാവ് വ്യക്തമാക്കി.
‘ആദ്യത്തെ ആഴ്ച തന്നെ 70% ജോലികളും ബാക്കെൻഡുമായി ബന്ധപ്പെട്ട ഒരു പ്രോജക്റ്റ് എന്നെ ഏൽപ്പിച്ചു. അതിൽ ചില ജോലികളെല്ലാം എനിക്ക് ചെയ്യാനായെങ്കിലും, ചിലത് എന്നെക്കൊണ്ട് സാധിക്കുന്നതായിരുന്നില്ല. വർക്ക് റിവ്യൂവിൽ വരുന്ന മൂന്നോ നാലോ ദിവസത്തെ കാലതാമസം പോലും എന്നെ കുറ്റപ്പെടുത്താനാണ് അവർ ഉപയോഗിച്ചത്. പലപ്പോഴും പ്രശ്നങ്ങൾ ചൂണ്ടിക്കാണിച്ചിരുന്നു. എന്നാല്‍, ഒന്നിനും പരിഹാരം ഉണ്ടായില്ല.
എന്നാല്‍, ഒരു ബോർഡംഗത്തിൽ ഒരു മെസേജ് വന്നപ്പോഴാണ് ഞാൻ ശരിക്കും ഞെട്ടിപ്പോയത്. എന്നെ പിരിച്ചുവിടുന്നു എന്നായിരുന്നു സന്ദേശം. എന്നോട് ഒന്നും അതിന് കുറിച്ച് സംസാരിച്ചിരുന്നില്ല. മേലുദ്യോഗസ്ഥരുമായി കാര്യങ്ങൾ ചർച്ച ചെയ്യാൻ ഞാൻ ശ്രമിച്ചെങ്കിലും സാധിച്ചില്ല. എന്റെ പിഴവുകൊണ്ടാണോ എന്നും എനിക്കറിയില്ല’ – യുവാവ് പറഞ്ഞു.
നിരവധി പേരാണ് പോസ്റ്റിനു പ്രതികരണവുമായി എത്തിയത്. ഇത് നിങ്ങളുടെ പ്രശ്നമല്ല, പരിതാപകരമായ മാനേജ്മെന്റിന്റെ പ്രശ്നമാണ് എന്നാണ് ഒരാളുടെ കമന്റ്. ചിലവ് ചുരുക്കുന്നതിന് വേണ്ടി മിക്കവാറും സ്റ്റാർട്ടപ്പുകൾ തുടക്കക്കാരെ ഇതുപോലെ ചൂഷണം ചെയ്യാറുണ്ട്, ജോലിക്ക് കയറും മുമ്പ് തന്നെ എന്തൊക്കെയാണ് നമ്മുടെ റോൾ എന്ന് കൃത്യമായി ചോദിച്ച് മനസ്സിലാക്കേണ്ടതുണ്ട് എന്നിങ്ങനെ നിരവധി കമന്റുകള്‍ പോസ്റ്റിനു താഴെ വന്നിട്ടുണ്ട് .
