തിരുവനന്തപുരം:കേരളത്തില് തിരുവനന്തപുരം മെഡിക്കല് കോളജില് സ്കിന് ബാങ്ക് ഒരു മാസത്തിനകം ആരംഭിക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ്. സ്കിന് ബാങ്കിനാവശ്യമായ സജ്ജീകരണങ്ങള് അന്തിമഘട്ടത്തിലാണ്. അവയവദാന പ്രക്രിയയിലൂടെ ത്വക്ക് ലഭ്യമാക്കാനായി കെ സോട്ടോയുടെ അനുമതി ആവശ്യമാണ്. അനുമതി ലഭിച്ച് ഒരു മാസത്തിനകം കമ്മീഷന് ചെയ്യും. കോട്ടയം മെഡിക്കല് കോളജില് കൂടി സ്കിന് ബാങ്ക് സ്ഥാപിക്കാനുള്ള നടപടികള് പുരോഗമിക്കുകയാണ്.
ത്വക്ക് ശേഖരിച്ച് പ്രിസര്വ് ചെയ്ത് വച്ച് ആവശ്യമുള്ള രോഗികള്ക്ക് നൂതന സാങ്കേതിക വിദ്യയുടെ സഹായത്തോടെ വച്ചുപിടിപ്പിക്കുകയാണ് സ്കിന് ബാങ്കിലൂടെ ചെയ്യുന്നത്. അപകടങ്ങളാലും പൊള്ളലേറ്റും ത്വക്കിന് കേടുപാട് സംഭവിച്ചവര്ക്ക് പകരം ത്വക്ക് വച്ച് പിടിപ്പിച്ചാല് അണുബാധയുണ്ടാകാതെ ഒരുപാട് പേരുടെ ജീവന് രക്ഷിക്കാനാകും.
പ്ലാസ്റ്റിക് സര്ജറി വിഭാഗത്തിന്റെ മേല്നോട്ടത്തിലാണ് ബേണ്സ് യൂണിറ്റുകള് പ്രവര്ത്തിക്കുന്നത്. തിരുവനന്തപുരം, കോട്ടയം, എറണാകുളം, തൃശൂര് മെഡിക്കല് കോളജുകളില് ബേണ്സ് യൂണിറ്റുകള് വിജയകരമായി പ്രവര്ത്തിച്ചു വരുന്നു. എറണാകുളം ജനറല് ആശുപത്രി, കൊല്ലം ജില്ലാ ആശുപത്രി എന്നിവിടങ്ങളില് ബേണ്സ് യൂണിറ്റുകളുണ്ട്. കോഴിക്കോട് മെഡിക്കല് കോളജില് ബേണ്സ് യൂണിറ്റ് സജ്ജമാക്കാനുള്ള പ്രവര്ത്തനങ്ങള് പുരോഗമിക്കുന്നു. കൊല്ലം, ആലപ്പുഴ, കണ്ണൂര് മെഡിക്കല് കോളജുകളില് കൂടി ബേണ്സ് യൂണിറ്റുകള് ആരംഭിക്കുന്നതിനുള്ള പ്രൊപ്പോസല് സമര്പ്പിക്കാന് നിര്ദേശം നല്കി.
മെഡിക്കല് കോളജുകളിലെ ബേണ്സ് ഐസിയുവില് സജ്ജമാക്കിയ തീവ്ര പരിചരണ സംവിധാനത്തിലൂടെ അണുബാധയേല്ക്കുന്നത് പരമാവധി കുറയ്ക്കാനും ജീവിതത്തിലേക്ക് തിരികെ കൊണ്ടുവരാനുമാണ് രോഗിയെ സഹായിക്കുന്നത്. 20 ശതമാനം മുതല് പൊള്ളലേറ്റ രോഗികള്ക്കുള്ള വിദഗ്ധ ചികിത്സയാണ് ബേണ്സ് ഐസിയുവിലൂടെ ലഭ്യമാക്കുന്നത്.
Discussion about this post