ന്യൂഡൽഹി : ഇന്തോനേഷ്യൻ പ്രസിഡൻ്റ് പ്രബോവോ സുബിയാന്തോ ഇന്ത്യാ സന്ദർശനത്തിനായി ഡൽഹിയിലെത്തി. ഇന്ത്യയുടെ 76-ാമത് റിപ്പബ്ലിക് ദിനാഘോഷത്തിൽ മുഖ്യാതിഥിയായി പങ്കെടുക്കുന്നതിന്റെ ഭാഗമായിട്ടാണ് അദ്ദേഹത്തിന്റെ ഇന്ത്യാ സന്ദർശനം. വിദേശകാര്യ മന്ത്രി എസ് ജയശങ്കറുമായി സുബിയാന്തോ കൂടിക്കാഴ്ച നടത്തി.
ജനുവരി 24 മുതൽ 26 വരെയാണ് പ്രബോവോ സുബിയാന്തോയുടെ ഇന്ത്യാ സന്ദർശനം. വെള്ളിയാഴ്ച രാത്രിയാണ് അദ്ദേഹം ന്യൂഡൽഹിയിലെത്തിയത്. വിദേശകാര്യ സഹമന്ത്രി പബിത്ര മാർഗരിറ്റ അദ്ദേഹത്തെ വിമാനത്താവളത്തിൽ സ്വീകരിച്ചു. ഇന്തോനേഷ്യൻ പ്രസിഡന്റ് ആയി തിരഞ്ഞെടുക്കപ്പെട്ടതിനുശേഷം അദ്ദേഹത്തിന്റെ ആദ്യത്തെ ഇന്ത്യ സന്ദർശനമാണിത്.
സുബിയാന്തോയുമായി ഉഭയകക്ഷി ബന്ധങ്ങളെക്കുറിച്ചുള്ള ചർച്ചകൾ നടത്തിയതായി എസ് ജയശങ്കർ എക്സിൽ കുറിച്ചു. ഇരുരാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതിന് സുബിയാന്തോയുടെ സാന്നിധ്യത്തിൻ്റെ പ്രാധാന്യം അദ്ദേഹം ചൂണ്ടിക്കാട്ടി. മൂന്ന് ദിവസം നീണ്ടുനിൽക്കുന്ന സന്ദർശനത്തിൻ്റെ ഭാഗമായി സുബിയാന്തോ പ്രധാനമന്ത്രി നരേന്ദ്ര മോദി, രാഷ്ട്രപതി ദ്രൗപതി മുർമു, ഉപരാഷ്ട്രപതി ജഗ്ദീപ് ധൻഖർ എന്നിവരുമായും കൂടിക്കാഴ്ച നടത്തും.
Discussion about this post