എറണാകുളം : സംസ്ഥാനത്ത് അതിരൂക്ഷ മഴക്കെടുതി. മൂന്ന് ജില്ലകളിൽ റെഡ് അലർട്ട് പ്രഖ്യാപിച്ചു. എറണാകുളം, തൃശ്ശൂർ, ഇടുക്കി ജില്ലകളിലാണ് റെഡ് അലർട്ട് പ്രഖ്യാപിച്ചിട്ടുള്ളത്. വിവിധ ജില്ലകളിൽ ഉണ്ടായ മഴക്കെടുതിയിൽ മൂന്നു മരണം സ്ഥിരീകരിച്ചു. തൃശ്ശൂരിൽ മിന്നൽ ചുഴലിയും കോഴിക്കോട് മലയിടിച്ചിലും ഉണ്ടായി. എറണാകുളത്ത് അതിരൂക്ഷമായ വെള്ളക്കെട്ടും തുടരുകയാണ്.
മഹാരാഷ്ട്ര തീരം മുതൽ കേരള തീരം വരെ തീരത്തോട് ചേർന്നുള്ള ന്യൂനമർദപാത്തിയും പശ്ചിമ ബംഗാളിന്റെ തീരത്തിന് മുകളിലും വടക്കു പടിഞ്ഞാറൻ ബംഗാൾ ഉൾക്കടലിനും മുകളിലുമായി തീവ്രന്യൂനമർദവും സ്ഥിതിചെയ്യുന്നതാണ് കേരളത്തിൽ ശക്തമായ മഴയ്ക്ക് കാരണമായിരിക്കുന്നത്. വരുംദിവസങ്ങളിലും കേരളത്തിൽ ശക്തമായ മഴ തുടരുമെന്നാണ് കേന്ദ്ര കാലാവസ്ഥ വകുപ്പ് വ്യക്തമാക്കുന്നത്. ജൂലൈ 29 വരെ കേരളത്തിൽ മഴ ശക്തമായി തുടരുമെന്നാണ് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകിയിട്ടുള്ളത്.
കേരളത്തിൽ നിലവിൽ മൂന്ന് ജില്ലകളിൽ റെഡ് അലർട്ടും 8 ജില്ലകളിൽ ഓറഞ്ച് അലർട്ടും ആണ് പ്രഖ്യാപിച്ചിരിക്കുന്നത്. 60 കിലോമീറ്റർ വരെ ശക്തമായ കാറ്റിനും സാധ്യതയുള്ളതായി മുന്നറിയിപ്പുണ്ട്.
