കാത്തിരിക്കുന്നത് വമ്പൻ നേട്ടങ്ങൾ, ആദ്യ മത്സരത്തിൽ തന്നെ ചരിത്രത്തിന്റെ ഭാഗമാകാൻ രോഹിത്; ഇനി അയാൾ ഭരിക്കും ആ ലിസ്റ്റ്

ദക്ഷിണാഫ്രിക്കയ്‌ക്കെതിരായ വരാനിരിക്കുന്ന മൂന്ന് മത്സരങ്ങളുള്ള ഏകദിന പരമ്പരയിൽ ഇന്ത്യൻ വെറ്ററൻ ബാറ്റ്‌സ്മാൻ രോഹിത് ശർമ്മ ഒന്നിലധികം നേട്ടങ്ങൾ കൈവരിക്കുന്നതിന് വക്കിലാണ്. 38 കാരനായ രോഹിത് ശർമ്മ ഏകദിന ഫോർമാറ്റിൽ ഇതിനകം 349 സിക്‌സറുകൾ നേടിയിട്ടുണ്ട്. വരാനിരിക്കുന്ന ഏകദിന പരമ്പരയിൽ മൂന്ന് എണ്ണം കൂടി നേടിയാൽ, ഏകദിന ചരിത്രത്തിൽ ഏറ്റവും കൂടുതൽ സിക്‌സറുകൾ നേടിയ കളിക്കാരനായി അദ്ദേഹം മാറും. അവിടെ അദ്ദേഹം ഷാഹിദ് അഫ്രീദിയുടെ 351 സിക്‌സറുകൾ എന്ന നേട്ടത്തെ മറികടക്കും.

തന്റെ ശ്രദ്ധേയമായ കരിയറിൽ, പവർ-ഹിറ്ററായി അറിയപ്പെടുന്ന രോഹിത് മൂന്ന് ഫോർമാറ്റുകളിലും നിരവധി സിക്‌സറുകൾ നേടിയിട്ടുണ്ട്. എന്നിരുന്നാലും, ഏകദിനങ്ങളിലേക്ക് വന്നാൽ അവിടെ രോഹിത്തിന്റെ സിക്സ് ഹിറ്റിങ് കഴിവിന്റെ മറ്റൊരു തലം നമുക്ക് കാണാൻ സാധിക്കും. 276 മത്സരങ്ങളിൽ നിന്ന് അദ്ദേഹമാകെ 11,370 റൺസ് നേടിയിട്ടുണ്ട്. ഏകദിന ക്രിക്കറ്റിൽ ഏറ്റവും കൂടുതൽ സിക്‌സറുകൾ നേടിയ ഇന്ത്യൻ കളിക്കാരനാണ് അദ്ദേഹം, 350 മത്സരങ്ങളിൽ നിന്ന് 229 സിക്‌സറുകളുമായി എംഎസ് ധോണിയാണ് ഇന്ത്യക്കാരിൽ രണ്ടാം സ്ഥാനത്ത്.

ഏകദിനത്തിൽ ഏറ്റവും കൂടുതൽ സിക്സറുകൾ നേടിയ കളിക്കാർ-

1. ഷാഹിദ് അഫ്രീദി (പാകിസ്ഥാൻ) – 351 സിക്സറുകൾ

2. രോഹിത് ശർമ്മ (ഇന്ത്യ) – 349 സിക്സറുകൾ

3. ക്രിസ് ഗെയ്ൽ (വെസ്റ്റ് ഇൻഡീസ്) – 331 സിക്സറുകൾ

4. സനത് ജയസൂര്യ (ശ്രീലങ്ക) – 270 സിക്സറുകൾ

5. എംഎസ് ധോണി (ഇന്ത്യ) – 229 സിക്സറുകൾ

അടുത്തിടെ സമാപിച്ച ഓസ്‌ട്രേലിക്കെതിരായ ഏകദിന പരമ്പരയിൽ തകർപ്പൻ പ്രകടനം നടത്തിയ രോഹിത് ആയിരുന്നു പരമ്പരയിലെ മാൻ ഓഫ് ദി സീരീസ്. മികച്ച പ്രകടനത്തിന്റെ പിന്നാലെ ഏകദിന ഫോർമാറ്റിൽ ഒന്നാം നമ്പർ ഏകദിന ബാറ്റ്‌സ്മാനായി താരം മാറുകയും ചെയ്തു.