വീണ്ടും അതേ കഥ; സഞ്ജു സാംസൺ ആരാധകരുടെ പ്രതിരോധം വീണ്ടും തകരുമ്പോൾ
ഇന്ത്യൻ ക്രിക്കറ്റിൽ ഇത്രയധികം ചർച്ച ചെയ്യപ്പെട്ട, എന്നാൽ ഇത്രയധികം അവ്യക്തത നിഴലിക്കുന്ന മറ്റൊരു പ്രതിഭയുണ്ടാവില്ല. സഞ്ജു സാംസൺ… ഈ പേര് കേൾക്കുമ്പോൾ തന്നെ ആരാധകരുടെ മനസ്സിൽ പ്രതീക്ഷയുടെ വലിയൊരു മലനിരയും, ഒപ്പം നിരാശയുടെ കയറാത്ത കയറ്റങ്ങളും വന്നുപോകും. സഞ്ജുവിനെക്കുറിച്ച് എപ്പോഴൊക്കെ ചർച്ചകൾ വരുമ്പോഴും ക്രിക്കറ്റ് വിദഗ്ധരും മുൻ താരങ്ങളും ചൂണ്ടിക്കാണിക്കുന്ന ഏറ്റവും വലിയ പോരായ്മയാണ് ‘സ്ഥിരതയില്ലായ്മ’. വെസ്റ്റ് ഇൻഡീസിനെതിരായ നിലവിലെ ടി20 പരമ്പരയും ഈ പഴയ കഥ തന്നെയാണ് ഒരിക്കൽ കൂടി ഓർമ്മിപ്പിക്കുന്നത്.
പരമ്പരയിലെ കയറ്റിറക്കങ്ങളും സഞ്ജുവിന്റെ അവസരങ്ങളും
വെസ്റ്റ് ഇൻഡീസിനെതിരായ ടി20 പരമ്പര ആരംഭിച്ചപ്പോൾ സഞ്ജുവിന് മുന്നിൽ ചോദ്യങ്ങൾ ഉണ്ടായിരുന്നു. ഏഷ്യൻ ഗെയിംസിലെ മോശം പ്രകടനം തന്നെ ആയിരുന്നു അതിന് കാരണം ആദ്യ മത്സരത്തിൽ ആരാധകരെ നിരാശപ്പെടുത്തിയെങ്കിലും, രണ്ടാം മത്സരത്തിൽ തകർപ്പൻ അർദ്ധസെഞ്ചുറിയുമായി സഞ്ജു തൻ്റെ തിരിച്ചുവരവ് പ്രഖ്യാപിച്ചു. അതോടെ ആരാധകർ സോഷ്യൽ മീഡിയയിൽ സഞ്ജുവിനെ അനുകൂലിച്ചും സപ്പോർട്ട് ചെയ്തും രംഗത്തെത്തി. എന്നാൽ, ആഘോഷങ്ങൾ നീണ്ടുനിന്നില്ല. പരമ്പരയിലെ മൂന്നാം മത്സരത്തിൽ ഇന്ന് വെറും മൂന്ന് റൺസിന് സഞ്ജു പുറത്തായത് ആരാധകർക്ക് കനത്ത തിരിച്ചടിയായി. ബാറ്റിംഗിന് ഏറെ അനുകൂലമായ, റൺസ് അനായാസം നേടാൻ കഴിയുന്ന മികച്ച ഒരു ട്രാക്കിലായിരുന്നു മത്സരം നടന്നത്. അതാത് പിച്ചിൽ അഭിഷേക് ശർമ്മയും ഇഷാൻ കിഷനും അടക്കമുള്ള മറ്റ് ബാറ്റ്‌സ്മാൻമാർ റൺസ് വാരിക്കൂട്ടുമ്പോഴാണ് സഞ്ജു അനാവശ്യ ഷോട്ട് കളിച്ച് വിക്കറ്റ് തുണയാക്കിയത്.
ആരാധകരുടെ പ്രതിരോധം എവിടെ പിഴയ്ക്കുന്നു?
സോഷ്യൽ മീഡിയയിൽ സഞ്ജുവിനെ ഒരു വലിയ വിഭാഗം ആരാധകർ എപ്പോഴും പിന്തുണയ്ക്കാറുണ്ട്. ടീമിൽ കൂടുതൽ അവസരങ്ങൾ ലഭിക്കണമെന്നും, അദ്ദേഹത്തിന് മാനസികമായി സ്വാതന്ത്ര്യം നൽകണമെന്നും അവർ വാദിക്കാറുണ്ട്. എന്നാൽ, ഇത്തരം പ്രകടനങ്ങൾ വരുമ്പോൾ ആ വാദങ്ങൾ പൂർണ്ണമായും പൊളിയുന്നു. സഞ്ജു തൻ്റെ മോശം ഷോട്ടുകളിലൂടെ പുറത്താകുമ്പോൾ, അദ്ദേഹത്തെ വിമർശിക്കുന്നവർക്ക് അത് വലിയൊരു ആയുധമായി മാറുന്നു. ആരാധകർക്ക് പിന്നെ എതിരാളികളുടെ വാദങ്ങളെ പ്രതിരോധിക്കാൻ സാധിക്കാതെ വരുന്നു. കിട്ടുന്ന അവസരങ്ങളുടെ ധൂർത്ത്: അഭിഷേക് ശർമ്മയും ഇഷാൻ കിഷനും പോലുള്ള യുവതാരങ്ങൾ അവസരങ്ങൾ കൃത്യമായി വിനിയോഗിക്കുമ്പോൾ, സഞ്ജുവിന് ലഭിക്കുന്ന സുവർണ്ണാവസരങ്ങളാണ് അശ്രദ്ധമായ ഷോട്ടുകളിലൂടെ നഷ്ടപ്പെടുന്നത്.
പിച്ചിന്റെ സ്വഭാവം മനസ്സിലാക്കി അല്പം കൂടി ഉത്തരവാദിത്തത്തോടെയും ക്ഷമയോടെയും ബാറ്റ് ചെയ്താൽ വലിയ സ്കോർ നേടാൻ സാധിക്കുന്ന സാഹചര്യമായിരുന്നു ഇന്നത്തേത്. എന്നാൽ അനാവശ്യമായ തിടുക്കം സഞ്ജുവിന് വിനയാകുന്നു. പ്രതിഭയുടെ കാര്യത്തിൽ സഞ്ജു സാംസൺ മുൻനിരയിലാണ് എന്നതിൽ രണ്ട് അഭിപ്രായമില്ല. ക്ലാസിക് ഷോട്ടുകളും മാച്ച് വിന്നിംഗ് ശേഷിയുമുള്ള താരമാണ് അദ്ദേഹം. എന്നാൽ ക്രിക്കറ്റിൽ പ്രതിഭ മാത്രം പോരാ, സ്ഥിരതയും സാഹചര്യങ്ങൾക്ക് അനുസരിച്ച് കളിക്കാനുള്ള പക്വതയും വേണം. ആരാധകർക്ക് സഞ്ജുവിന് വേണ്ടി നെഞ്ചുവിരിച്ചു സംസാരിക്കണമെങ്കിൽ, സഞ്ജു തന്നെ ബാറ്റിംഗിലൂടെ അതിനുള്ള മറുപടി നൽകേണ്ടതുണ്ട്. ഇല്ലെങ്കിൽ ഈ സ്ഥിരതയില്ലായ്മയുടെ വടി ആരാധകർക്ക് തന്നെയാകും എതിരാളികൾ സമ്മാനിക്കുക.
