ന്യൂഡൽഹി : എയർബസ് വിമാനങ്ങളിൽ അടിയന്തര മാറ്റങ്ങൾക്ക് ഉത്തരവിട്ട് ഡയറക്ടർ ജനറൽ ഓഫ് സിവിൽ ഏവിയേഷൻ (ഡിജിസിഎ). എയർബസ് എ318, എ319, എ320, എ321 വിമാനങ്ങൾക്ക് ആണ് നിർബന്ധിത സുരക്ഷാ ഉത്തരവ് പുറപ്പെടുവിച്ചിരിക്കുന്നത്. എയർബസ് നൽകിയിട്ടുള്ള സുരക്ഷാ മുന്നറിയിപ്പ് പ്രകാരം നിർബന്ധിതമായ അടിയന്തര സോഫ്റ്റ്‌വെയർ അല്ലെങ്കിൽ ഹാർഡ്‌വെയർ മാറ്റങ്ങൾ നടപ്പിലാക്കുന്നത് വരെ ഈ വിമാനങ്ങൾ സർവീസ് നടത്തരുത് എന്നും ഡിജിസിഎ ഉത്തരവിട്ടു.
എയർബസിന്റെ സോഫ്റ്റ്‌വെയർ അപ്ഡേറ്റുകൾ മൂലം വിമാന സർവീസുകൾ നിർത്തിവയ്ക്കുന്നത് ഇന്ത്യയുടെ വ്യോമ ഗതാഗതത്തെ സാരമായി ബാധിക്കുമെന്ന് കരുതപ്പെടുന്നു. ഇന്ത്യയിൽ, ഇൻഡിഗോയും എയർ ഇന്ത്യയും സർവീസ് നടത്തുന്ന 350-ലധികം എ320 വിമാനങ്ങൾ രണ്ടോ മൂന്നോ ദിവസത്തേക്ക് സർവീസ് നിർത്തിവയ്ക്കും. ചില വിമാനങ്ങൾക്ക് ഷെഡ്യൂൾ മാറ്റങ്ങൾ നേരിടേണ്ടിവരുമെന്ന് എയർലൈനുകൾ യാത്രക്കാർക്ക് മുന്നറിയിപ്പ് നൽകിയിട്ടുണ്ട്.
2025 ഒക്ടോബർ 30-ന് കാൻകൂണിൽ നിന്ന് ന്യൂവാർക്കിലേക്ക് പറന്ന ജെറ്റ്ബ്ലൂ A320 വിമാനവുമായി ബന്ധപ്പെട്ട ഒരു സംഭവമാണ് എയർബസ് വിമാനങ്ങളുടെ അപ്‌ഗ്രേഡിന് കാരണമായത്. നാഷണൽ ട്രാൻസ്‌പോർട്ടേഷൻ സേഫ്റ്റി ബോർഡിന്റെ അഭിപ്രായത്തിൽ, വിമാനം പൈലറ്റ് ഇൻപുട്ട് ഇല്ലാതെ അപ്രതീക്ഷിതമായി താഴേക്ക് പിച്ച്(ഇൻ) ചെയ്തു. ഈ സംഭവത്തെ തുടർന്നാണ് എയർബസ് എ318, എ319, എ320, എ321 വിമാനങ്ങളിൽ അടിയന്തര അപ്ഡേറ്റിന് ഉത്തരവിട്ടിട്ടുള്ളത്.
Discussion about this post