ചണ്ഡീഗഡ് : പഞ്ചാബിലെ ആദംപൂർ വിമാനത്താവളം ഇനി പുതിയ പേരിൽ അറിയപ്പെടും. വിമാനത്താവളത്തിന്റെ പുതിയ പേര് ശ്രീ സന്ത് ഗുരു രവിദാസ് ജി വിമാനത്താവളം എന്നാക്കി പ്രധാനമന്ത്രി നരേന്ദ്ര മോദി ഞായറാഴ്ച അനാച്ഛാദനം ചെയ്തു. ഗുരു രവിദാസിന്റെ 649-ാം ജന്മവാർഷികത്തിൽ അദ്ദേഹത്തിനുള്ള ആദരവായിട്ടാണ് ഈ പ്രഖ്യാപനം. അതോടൊപ്പം ഇന്ന് പഞ്ചാബിലെ ലുധിയാനയിലെ ഹൽവാര വിമാനത്താവളത്തിന്റെ പുതിയ ടെർമിനൽ കെട്ടിടവും പ്രധാനമന്ത്രി ഉദ്ഘാടനം നിർവഹിച്ചു.
കേന്ദ്ര സിവിൽ വ്യോമയാന മന്ത്രി രാം മോഹൻ നായിഡു കിഞ്ചരാപു, പഞ്ചാബ് മുഖ്യമന്ത്രി ഭഗവന്ത് മാൻ, കേന്ദ്രമന്ത്രി രവ്നീത് സിംഗ് ബിട്ടു തുടങ്ങിയവരും ലുധിയാനയിൽ നടന്ന ചടങ്ങിൽ പ്രധാനമന്ത്രിയോടൊപ്പം പങ്കെടുത്തു. തുടർന്ന് ജലന്ധറിൽ ഒരു പൊതു സമ്മേളനത്തെ അഭിസംബോധന ചെയ്തുകൊണ്ട് പ്രധാനമന്ത്രി സംസാരിച്ചു. 2026 ലെ കേന്ദ്ര ബജറ്റ് സ്ത്രീകളെയും യുവാക്കളെയും ശക്തിപ്പെടുത്തുന്നതാണെന്ന് അദ്ദേഹം പറഞ്ഞു. ഇത് കർഷകരുടെ വരുമാനം വർദ്ധിപ്പിക്കുകയും ഇന്ത്യയെ ‘ആത്മനിർഭർ’ ആകുന്നതിന് സഹായിക്കുകയും ചെയ്യുമെന്നും അദ്ദേഹം പറഞ്ഞു.
Discussion about this post