ആൻഡ്രോയിഡ് ഉപഭോക്താക്കൾക്ക് ഗൂഗിളിന്റെ ‘റെഡ് അലർട്ട്’; ഈ ആപ്പുകൾ ഉടൻ നീക്കം ചെയ്യൂ! ഫോൺ ചോർത്തുന്ന ‘ആർസിങ്ക്’ വൈറസ് പടരുന്നു

ലോകമെമ്പാടുമുള്ള ദശലക്ഷക്കണക്കിന് ആൻഡ്രോയിഡ് ഉപഭോക്താക്കൾക്ക് അതീവ ജാഗ്രതാ നിർദ്ദേശവുമായി ഗൂഗിൾ. സ്മാർട്ട്‌ഫോണുകളെ പൂർണ്ണമായും നിയന്ത്രിക്കാൻ ശേഷിയുള്ള ‘ആർസിങ്ക്’ (Arsink) എന്ന പുതിയ മാല്വെയർ (Malware) അതിവേഗം പടരുന്നതായാണ് റിപ്പോർട്ട്. ഔദ്യോഗിക ആപ്പുകളോട് സാമ്യമുള്ള വ്യാജന്മാരെ ഉപയോഗിച്ചാണ് ഹാക്കർമാർ ഉപഭോക്താക്കളുടെ സ്വകാര്യ വിവരങ്ങൾ കവരുന്നത്. സന്ദേശങ്ങൾ വായിക്കാനും കാൾ ലോഗുകൾ പരിശോധിക്കാനും കോൺടാക്റ്റുകൾ മോഷ്ടിക്കാനും മാത്രമല്ല, ഫോണിലെ മൈക്രോഫോൺ ഉപയോഗിച്ച് നിങ്ങളുടെ സംഭാഷണങ്ങൾ രഹസ്യമായി കേൾക്കാനും ഈ വൈറസിന് സാധിക്കുമെന്ന് സൈബർ സുരക്ഷാ വിദഗ്ധർ മുന്നറിയിപ്പ് നൽകുന്നു.

സിംപെറിയം എന്ന സുരക്ഷാ ഏജൻസിയുടെ റിപ്പോർട്ട് പ്രകാരം, ലോകമെമ്പാടുമുള്ള പഴയ ആൻഡ്രോയിഡ് ഫോണുകളിൽ 40 ശതമാനവും നിലവിൽ സുരക്ഷിതമല്ല. ഗൂഗിൾ, സ്പോട്ടിഫൈ, യൂട്യൂബ്, വാട്ട്‌സ്ആപ്പ്, ഇൻസ്റ്റാഗ്രാം, ഫേസ്ബുക്ക്, ടെലിഗ്രാം, ടിക് ടോക് തുടങ്ങിയ പ്രമുഖ പ്ലാറ്റ്‌ഫോമുകളുടെ പേരും ലോഗോയും അനുകരിച്ചാണ് ഈ വ്യാജ ആപ്പുകൾ പ്രചരിക്കുന്നത്. ഗൂഗിൾ പ്ലേ സ്റ്റോറിന് പുറത്തുള്ള തേർഡ് പാർട്ടി വെബ്‌സൈറ്റുകൾ, സോഷ്യൽ മീഡിയ പരസ്യങ്ങൾ, ലിങ്കുകൾ എന്നിവ വഴിയാണ് ഹാക്കർമാർ ഉപഭോക്താക്കളെ കെണിയിൽ വീഴ്ത്തുന്നത്. പലപ്പോഴും കൂടുതൽ ഫീച്ചറുകൾ വാഗ്ദാനം ചെയ്ത് ഉപഭോക്താക്കളെ പ്രലോഭിപ്പിച്ചാണ് ഈ ആപ്പുകൾ ഇൻസ്റ്റാൾ ചെയ്യിപ്പിക്കുന്നത്.

ആൻഡ്രോയിഡ് 13-ന് താഴെയുള്ള പഴയ സോഫ്റ്റ്‌വെയറുകളിൽ പ്രവർത്തിക്കുന്ന ഫോണുകളാണ് ഏറ്റവും വലിയ ഭീഷണി നേരിടുന്നത്. പുതിയ സുരക്ഷാ അപ്‌ഡേറ്റുകൾ ലഭിക്കാത്ത ഇത്തരം ഫോണുകളിൽ കടന്നുകൂടാൻ ഹാക്കർമാർക്ക് എളുപ്പമാണ്. ഇൻസ്റ്റാൾ ചെയ്തുകഴിഞ്ഞാൽ ഫോണിന്റെ വേഗത കുറയുകയോ ബാറ്ററി പെട്ടെന്ന് തീരുകയോ ചെയ്യുന്നത് ഇത്തരം മാല്വെയറുകളുടെ ലക്ഷണമാകാം. ആൻഡ്രോയിഡ് ഉപഭോക്താക്കളുടെ എണ്ണത്തിൽ ലോകത്ത് മുൻപന്തിയിലുള്ള ഇന്ത്യ പോലുള്ള രാജ്യങ്ങളിൽ ഈ ഭീഷണി അതീവ ഗൗരവകരമാണ്. അശ്രദ്ധമായി ലിങ്കുകളിൽ ക്ലിക്ക് ചെയ്യുന്നതും പ്ലേ സ്റ്റോറിന് പുറത്തുനിന്ന് ആപ്പുകൾ ഡൗൺലോഡ് ചെയ്യുന്നതും ഒഴിവാക്കണമെന്ന് വിദഗ്ധർ നിർദ്ദേശിക്കുന്നു.

ഫോണിലെ സെറ്റിംഗ്സിൽ പോയി സോഫ്റ്റ്‌വെയർ വേർഷൻ പരിശോധിക്കാനും സാധ്യമെങ്കിൽ പുതിയ അപ്‌ഡേറ്റിലേക്ക് മാറാനും ഗൂഗിൾ നിർദ്ദേശിക്കുന്നു. ഗൂഗിൾ പ്ലേ പ്രൊട്ടക്റ്റ് (Google Play Protect) ഫീച്ചർ എപ്പോഴും ഓൺ ആക്കി ഇടുന്നത് ഇത്തരം അപകടകാരികളായ ആപ്പുകളെ കണ്ടെത്താൻ സഹായിക്കും. അജ്ഞാതമായ സ്രോതസ്സുകളിൽ നിന്ന് ഡൗൺലോഡ് ചെയ്ത സംശയാസ്പദമായ ആപ്പുകൾ ഫോണിലുണ്ടെങ്കിൽ അവ ഉടനടി നീക്കം ചെയ്യുക. നിങ്ങളുടെ ബാങ്കിംഗ് വിവരങ്ങളും പാസ്‌വേഡുകളും ഉൾപ്പെടെയുള്ള സ്വകാര്യ വിവരങ്ങൾ സംരക്ഷിക്കാൻ അതീവ ജാഗ്രത പാലിക്കേണ്ട സമയമാണിത്.