മിഡ്‌നൈറ്റ് ഹാമർ’ മറക്കരുത്; ഇറാനെ വിറപ്പിച്ച് ട്രംപിന്റെ മുന്നറിയിപ്പ്! നെതന്യാഹുവുമായി കൂടിക്കാഴ്ച നടത്തി യുഎസ് പ്രസിഡന്റ്

ഇറാൻ ഭരണകൂടത്തിന് കടുത്ത ഭാഷയിൽ മുന്നറിയിപ്പുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി വൈറ്റ് ഹൗസിൽ നടത്തിയ നിർണ്ണായക കൂടിക്കാഴ്ചയ്ക്ക് പിന്നാലെയാണ് ട്രംപ് ഇറാന്റെ നെഞ്ചിടിപ്പ് കൂട്ടുന്ന പ്രസ്താവന നടത്തിയത്. ചർച്ചകൾക്ക് ഇറാൻ തയ്യാറാകണമെന്നും അല്ലാത്തപക്ഷം കഴിഞ്ഞ വർഷം ജൂൺ 21-ന് ഉണ്ടായ ‘മിഡ്‌നൈറ്റ് ഹാമർ’ (Midnight Hammer) ആക്രമണം ഓർമ്മയുണ്ടാകണമെന്നുമാണ് ട്രംപിന്റെ മുന്നറിയിപ്പ്. ട്രംപ് രണ്ടാം തവണ അധികാരമേറ്റ ശേഷം നെതന്യാഹുവുമായി നടത്തുന്ന ഏഴാമത്തെ കൂടിക്കാഴ്ചയായിരുന്നു ഇത്.

കഴിഞ്ഞ വർഷം ജൂൺ 21-ന് ഇറാന്റെ ആണവ കേന്ദ്രങ്ങൾ ഉൾപ്പെടെയുള്ള മൂന്ന് പ്രധാന സൈനിക താവളങ്ങളെ ലക്ഷ്യമാക്കി അമേരിക്ക നടത്തിയ മിന്നലാക്രമണമാണ് ‘മിഡ്‌നൈറ്റ് ഹാമർ’ എന്നറിയപ്പെടുന്നത്. സമാധാന ചർച്ചകളിൽ നിന്ന് ഇറാൻ പിൻവാങ്ങിയതിന് തൊട്ടുപിന്നാലെയായിരുന്നു അമേരിക്കയുടെ ഈ സൈനിക നടപടി. ഇത്തവണ കൂടുതൽ ഉത്തരവാദിത്തത്തോടെ ഇറാൻ പെരുമാറുമെന്ന് പ്രതീക്ഷിക്കുന്നുവെന്ന് ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യലിൽ’ കുറിച്ചു. കഴിഞ്ഞ തവണ കരാറിന് തയ്യാറാകാതിരുന്ന ഇറാൻ മിഡ്‌നൈറ്റ് ഹാമറിന്റെ പ്രത്യാഘാതം അനുഭവിച്ചതാണെന്നും ഇത്തവണ ബുദ്ധിപൂർവ്വം പെരുമാറുമെന്നാണ് കരുതുന്നതെന്നും അദ്ദേഹം ഓർമ്മിപ്പിച്ചു.

ഒമാനിൽ വെച്ച് ഇറാനുമായി പരോക്ഷമായി നടക്കുന്ന ചർച്ചകൾ തുടരാൻ താൻ നെതന്യാഹുവുനോട് ആവശ്യപ്പെട്ടതായി ട്രംപ് വെളിപ്പെടുത്തി. ഇസ്രായേലിന്റെ ആശങ്കകൾ മാനിച്ചുകൊണ്ടുതന്നെ ഇറാനുമായി ഒരു പുതിയ കരാറിലെത്താനാണ് താൻ ആഗ്രഹിക്കുന്നതെന്ന് ട്രംപ് നെതന്യാഹുവിനെ അറിയിച്ചു. ഗാസയിലെ സ്ഥിതിഗതികളും മേഖലയിലെ സമാധാനശ്രമങ്ങളും ഇരുവരും ചർച്ച ചെയ്തു. പശ്ചിമേഷ്യയിൽ സമാധാനം പുനഃസ്ഥാപിക്കാനുള്ള ശ്രമങ്ങൾ പുരോഗമിക്കുകയാണെന്നും ട്രംപ് അവകാശപ്പെട്ടു. ഇസ്രായേലും അമേരിക്കയും തമ്മിലുള്ള ബന്ധം കൂടുതൽ കരുത്തോടെ തുടരുമെന്ന് നെതന്യാഹുവിന്റെ ഓഫീസും വ്യക്തമാക്കി.

ഇറാന്റെ ആണവ പദ്ധതികളെ സംബന്ധിച്ച് ഒമാനിൽ നടക്കുന്ന ചർച്ചകളിൽ ശുഭാപ്തിവിശ്വാസമുണ്ടെന്ന് സൂചനയുണ്ടെങ്കിലും, സൈനിക നടപടിയുടെ ഭീഷണി നിലനിർത്തിക്കൊണ്ടുള്ള ട്രംപിന്റെ നീക്കം ഇറാനെ സമ്മർദ്ദത്തിലാക്കിയിരിക്കുകയാണ്. പ്രതിഷേധക്കാർക്കെതിരെ ഇറാൻ നടത്തുന്ന അടിച്ചമർത്തലുകളിൽ മുൻപും ട്രംപ് കടുത്ത പ്രതിഷേധം അറിയിച്ചിരുന്നു. ട്രംപ്-നെതന്യാഹു സഖ്യം കൂടുതൽ ശക്തമാകുന്നത് മേഖലയിലെ രാഷ്ട്രീയ സമവാക്യങ്ങളിൽ വലിയ മാറ്റങ്ങൾ വരുത്തുമെന്നാണ് വിലയിരുത്തപ്പെടുന്നത്.