ട്വന്റി-20 ലോകകപ്പിന്റെ ആവേശകരമായ തുടക്കത്തിന് ശേഷം ഇന്ത്യ ഇന്ന് തങ്ങളുടെ രണ്ടാം മത്സരത്തിൽ നമീബിയയെ നേരിടുകയാണ്. ഡൽഹിയിലെ അരുൺ ജെയ്റ്റ്ലി സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ നമീബിയ ഇന്ത്യയെ ബാറ്റിംഗിന് അയച്ചു. ആദ്യ മത്സരത്തിൽ യുഎസ്എയെ 29 റൺസിന് തോൽപ്പിച്ച ആത്മവിശ്വാസത്തിലാണ് സൂര്യകുമാർ യാദവും സംഘവും ഇന്ന് ഇറങ്ങുന്നത്.
അതേസമയം ലോകകപ്പിന്റെ ഉദ്ഘാടന ചടങ്ങിൽ നിന്നുള്ള ഒരു രസകരമായ വീഡിയോ ആണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. ബോളിവുഡ് താരം നോറ ഫത്തേഹിയുടെ നൃത്തപ്രകടനം ഡ്രെസ്സിംഗ് റൂമിലെ ഗാലറിയിലിരുന്ന് ആസ്വദിക്കുകയായിരുന്നു ക്യാപ്റ്റൻ സൂര്യകുമാർ യാദവ്. ഈ സമയം സൂര്യകുമാറിന്റെ ഭാര്യ ദേവിഷ ഷെട്ടി ക്യാമറയുമായി താരത്തെ കുടുക്കുകയായിരുന്നു.
സൂര്യകുമാർ തംബ്സ് അപ്പ് കാണിച്ച് ചിരിക്കുന്നതും പിന്നാലെ അർഷ്ദീപ് സിംഗും ഇഷാൻ കിഷനും ചേർന്ന് ക്യാപ്റ്റനെ കളിയാക്കുന്നതും വീഡിയോയിലുണ്ട്. “4K-യിൽ കൈയോടെ പിടികൂടി” എന്ന അടിക്കുറിപ്പോടെയാണ് ആരാധകർ ഈ ദൃശ്യങ്ങൾ പങ്കുവെക്കുന്നത്. നമീബിയക്കെതിരായ ഇന്നത്തെ മത്സരത്തിൽ ഇന്ത്യൻ നിരയിൽ പ്രധാന മാറ്റങ്ങളുണ്ട്. ഓപ്പണർ അഭിഷേക് ശർമയ്ക്ക് അസുഖം ബാധിച്ചതിനെത്തുടർന്ന് മലയാളി താരം സഞ്ജു സാംസൺ പ്ലേയിംഗ് ഇലവനിലേക്ക് തിരിച്ചെത്തി.
ആദ്യ മത്സരത്തിൽ വിശ്രമത്തിലായിരുന്ന ബുംറയും ടീമിൽ ഇടംപിടിച്ചു. നമീബിയക്കെതിരായ മത്സരത്തിന് ശേഷം ഇന്ത്യ നേരിടുന്നത് തങ്ങളുടെ ചിരവൈരികളായ പാകിസ്താനെയാണ്. ഫെബ്രുവരി 15 ഞായറാഴ്ച ശ്രീലങ്കയിലെ കൊളംബോ ആർ. പ്രേമദാസ സ്റ്റേഡിയത്തിലാണ് ഈ ഹൈ-വോൾട്ടേജ് മത്സരം. ടൂർണമെന്റിലെ പാകിസ്താന്റെ എല്ലാ മത്സരങ്ങളും ശ്രീലങ്കയിലാണ് നടക്കുന്നത് എന്നത് അവർക്ക് അവിടുത്തെ പിച്ചുകളെക്കുറിച്ച് കൂടുതൽ ധാരണ നൽകുന്നുണ്ട്. ഇത് ഇന്ത്യയ്ക്ക് വലിയ വെല്ലുവിളിയാകുമെന്നാണ് വിലയിരുത്തൽ.
Surya Kumar Yadav’s wife caught him in 4K watching Nora Fatehi’s dance performance at the opening ceremony. Hilarious reactions from Ishan Kishan and Arshdeep Singh! 😃 pic.twitter.com/EopH7WvOez
— Deepu (@deepu_drops) February 12, 2026
