നിർണായക ഇന്നിങ്സുകൾ കളിച്ച് മത്സരം തിരിച്ചുപിടിക്കാനുള്ള സഞ്ജു സാംസണിന്റെ കഴിവ് വരാനിരിക്കുന്ന ന്യൂസിലൻഡ് ടി20 പരമ്പരയിൽ യുവതാരം വൈഭവ് സൂര്യവംശിയുടെ അരങ്ങേറ്റത്തിന് തടസ്സമായേക്കുമെന്ന് മുൻ ഇന്ത്യൻ അസിസ്റ്റന്റ് കോച്ച് അഭിഷേക് നായർ. തുടർച്ചയായ തോൽവികൾക്ക് ശേഷം പെട്ടെന്ന് മികച്ചൊരു പ്രകടനത്തിലൂടെ വിമർശകരുടെ വായടപ്പിക്കുന്ന ശൈലിയാണ് സഞ്ജുവിന്റേതെന്നും, ഇത് വൈഭവിന് അവസരം ലഭിക്കുന്നത് വൈകിപ്പിക്കുമെന്നും അദ്ദേഹം വ്യക്തമാക്കി. ജിയോസ്റ്റാറിനോട് സംസാരിക്കവെയാണ് അഭിഷേക് നായർ ടീം കോമ്പിനേഷനെയും താരങ്ങളുടെ തിരഞ്ഞെടുപ്പിനെയും സംബന്ധിച്ച നിരീക്ഷണങ്ങൾ പങ്കുവെച്ചത്.
രണ്ടോ മൂന്നോ മത്സരങ്ങളിൽ റണ്ണെടുക്കാൻ സാധിച്ചില്ലെങ്കിൽ സഞ്ജുവിനെ മാറ്റണമെന്നും വൈഭവിന് അവസരം നൽകണമെന്നും ആരാധകർ ആവശ്യപ്പെടും. എന്നാൽ ആ ഘട്ടത്തിൽ തന്നെ ഒരു 80 റൺസ് നേടി സഞ്ജു തനിക്കെതിരെയുള്ള ചോദ്യങ്ങൾ അവസാനിപ്പിക്കും. ഇതാണ് സഞ്ജുവിന്റെ ശൈലിയെന്നും അതിനാൽ വൈഭവിന് തന്റെ അവസരത്തിനായി ഇനിയും കാത്തിരിക്കേണ്ടി വരുമെന്നും നായർ കൂട്ടിച്ചേർത്തു. വ്യക്തിഗത പ്രകടനങ്ങൾക്കപ്പുറം ടീമിന്റെ ബാറ്റിംഗ് ബാലൻസും ഇടത്-വലത് കോമ്പിനേഷനും നിലനിർത്തേണ്ടത് കോച്ചിന്റെയും ക്യാപ്റ്റന്റെയും ഉത്തരവാദിത്തമാണ്. അനാവശ്യമായ മാറ്റങ്ങൾ ടീം സംസ്കാരത്തെ ബാധിക്കുമെന്നും അതിനാൽ കൃത്യമായ സമയത്ത് മാത്രമേ വൈഭവിന് അവസരം ലഭിക്കൂ എന്നും അദ്ദേഹം ഓർമ്മിപ്പിച്ചു.
അതേസമയം, ന്യൂസിലൻഡിന്റെ അതിവേഗ ഓപ്പണർ ഫിൻ അലൻ പരമ്പരയിൽ ഇന്ത്യയ്ക്ക് വലിയ ഭീഷണിയാകാൻ സാധ്യതയുണ്ടെന്നും അഭിഷേക് നായർ നിരീക്ഷിച്ചു. ചെറിയ ഗ്രൗണ്ടുകളും അനുകൂലമായ പിച്ചുകളും ഫിൻ അലന്റെ ആക്രമണകാരിയായ ബാറ്റിംഗ് ശൈലിക്ക് ഏറെ അനുയോജ്യമാണ്. ഫോമിലേക്ക് ഉയർന്നാൽ അതിവേഗം സെഞ്ചുറി നേടാനും ഇന്ത്യൻ താരം അഭിഷേക് ശർമ്മയുടെ വേഗമേറിയ ടി20 സെഞ്ചുറി റെക്കോർഡ് പോലും മറികടക്കാനും ഫിൻ അലന് ശേഷിയുണ്ടെന്ന് അദ്ദേഹം വിലയിരുത്തി.
