അസോസിയേറ്റ് രാജ്യങ്ങളിൽ നിന്നുള്ള താരങ്ങൾ ക്രിക്കറ്റിനെ സമീപിക്കുന്ന രീതി പലപ്പോഴും കൗതുകകരവും മാതൃകാപരവുമാണ്. ടി20 ലോകകപ്പിൽ ഇംഗ്ലണ്ടിനെതിരായ മത്സരത്തിൽ സ്കോട്ട്ലൻഡ് താരങ്ങൾ നടത്തിയ ഒരു നീക്കം ഇപ്പോൾ ക്രിക്കറ്റ് ലോകത്ത് വലിയ ചർച്ചയാകുന്നു.
ഓരോ ഇംഗ്ലണ്ട് ബാറ്റ്സ്മാനും ക്രീസിലെത്തുമ്പോൾ, അവർക്കായി തയ്യാറാക്കിയ തന്ത്രങ്ങൾ ഒരു പേപ്പറിൽ നോക്കി വായിച്ച് അത് നടപ്പിലാക്കുന്ന സ്കോട്ട്ലൻഡ് ബൗളർമാരുടെ ദൃശ്യങ്ങളാണ് വൈറലാകുന്നത്. ക്രിക്കറ്റിലെ വമ്പൻമാരായ ഇംഗ്ലണ്ടിനെ നേരിടുമ്പോൾ സ്കോട്ട്ലൻഡ് താരങ്ങൾ നടത്തിയ തയ്യാറെടുപ്പുകൾ ആരാധകരുടെ കൈയടി നേടുകയാണ്.
ടെക്നോളജിയുടെയും വലിയ വിശകലന വിദഗ്ധരുടെയും സഹായമില്ലാതെ, ലളിതവും എന്നാൽ കൃത്യവുമായ രീതിയിലാണ് അവർ ഇംഗ്ലീഷ് ബാറ്റിംഗ് നിരയെ പൂട്ടാൻ ഒരുങ്ങിയത്. മത്സരത്തിനിടയിൽ സ്കോട്ട്ലൻഡ് ബൗളർമാർ തങ്ങളുടെ കൈയ്യിലുള്ള ഒരു ചെറിയ പേപ്പർ നോക്കി വായിക്കുന്നത് ദൃശ്യങ്ങളിൽ വ്യക്തമാണ്.’
ഓരോ ബാറ്റ്സ്മാന്റെയും ദൗർബല്യങ്ങളും, അവർ എവിടെ പന്തെറിഞ്ഞാൽ പുറത്താകുമെന്നുമുള്ള വിവരങ്ങൾ കുറിപ്പുകളായി തയ്യാറാക്കിയാണ് അവർ കളിക്കാനിറങ്ങിയത്. ബൗളിംഗ് റണ്ണപ്പിന് മുൻപ് ഈ പേപ്പർ നോക്കി പ്ലാൻ ഉറപ്പിച്ച ശേഷമാണ് അവർ പന്തെറിഞ്ഞത്. വലിയ സൗകര്യങ്ങളോ കോടികളുടെ നിക്ഷേപമോ ഇല്ലാത്ത അസോസിയേറ്റ് ടീമുകൾ എത്രത്തോളം ആത്മാർത്ഥതയോടെയാണ് ഓരോ മത്സരത്തെയും സമീപിക്കുന്നത് എന്നതിന്റെ തെളിവാണ് ഈ സംഭവം. ഓരോ ചെറിയ വിവരവും ശേഖരിച്ച് അത് കൃത്യമായി നടപ്പിലാക്കാനുള്ള അവരുടെ ശ്രമം വലിയ ടീമുകൾക്ക് പോലും ഒരു പാഠമാണ്.
Discussion about this post