കൊല്ലം : ഹിന്ദു ആണെന്നതിലും അത് തുറന്നു പറയുന്നതിലും അഭിമാനമാണ് ഉള്ളതെന്ന് നടി അനുശ്രീ. കൊട്ടാരക്കര നഗരം ഹിന്ദു ഏകതാ സമ്മേളനത്തിൽ മുഖ്യാതിഥിയായി പങ്കെടുത്ത സംസാരിക്കുമ്പോഴായിരുന്നു അനുശ്രീ ഇക്കാര്യം വ്യക്തമാക്കിയത്. തന്റെ വിശ്വാസത്തിലും സംസ്കാരത്തിലും ഉറച്ചുനിന്നതിന്റെ പേരിൽ നിരവധി ഭവിഷ്യത്തുകൾ നേരിടേണ്ടി വന്നിട്ടുണ്ടെന്നും അനുശ്രീ തുറന്നു പറഞ്ഞു. ബാലഗോകുലത്തിൽ പഠിച്ച പാഠങ്ങൾ ഇന്നും പ്രചോദനമാകുന്നതിനാൽ വിശ്വാസത്തെ അഭിമാനത്തോടെ കാണുന്നുവെന്നും അനുശ്രീ വ്യക്തമാക്കി. ഏകതാ സമ്മേളനത്തോടനുബന്ധിച്ചു നടന്ന പ്രശ്നോത്തരി, ചിത്രരചന മത്സരങ്ങളിലെ വിജയികൾക്ക് അനുശ്രീ ഉപഹാരങ്ങൾ സമ്മാനിച്ചു.
സംഘാടക സമിതി പ്രസിഡന്റ് വിനായക എസ് അജിത് കുമാറിന്റെ അധ്യക്ഷതയിൽ സദാനന്ദ പുരം അവധൂതാശ്രമം മഠാധിപതി സ്വാമി ചിദാനന്ദഭാരതി ഹിന്ദു ഏകതാ സമ്മേളനം ഭദ്രദീപം കൊളുത്തി ഉത്ഘാടനം ചെയതു. രാഷ്ട്രീയ സ്വയം സേവക സംഘം പ്രാന്തീയ ധർമ്മ ജാഗരൺ സംയോജക് എം ആർ കൃഷ്ണകുമാർ മുഖ്യ പ്രഭാഷണം നടത്തി. സംഘാടക സമിതി ജനറൽ സെക്രട്ടറി ശിവപ്രസാദ്, ജില്ലാ സംഘ ചാലക് ആർ ദിവാകരൻ, ജില്ലാ സേവ പ്രമുഖ് എം ദീപക്, ഖണ്ഡ് കാര്യവാഹക് വി അരുൺ,സംയോജക് വി ജി ഗണേഷ്, ട്രഷറർ സുധീഷ്, ബി സുജിത്, ബിജു പടിഞ്ഞാറ്റിങ്കര, മനു തൃക്കണ്ണമംഗൽ, സോമശേഖരൻപിള്ള, രാമചന്ദ്രൻ പിള്ള, ശിവൻ തൃക്കണ്ണമംഗൽ, എന്നിവർ സംസാരിച്ചു.
