2026 ടി20 ലോകകപ്പ് ഫൈനലിന് അഹമ്മദാബാദ് ഒരുങ്ങുമ്പോൾ, കിരീടം നേടാൻ മൈതാനത്തെ പോരാട്ടത്തിനൊപ്പം ‘ഭാഗ്യപരീക്ഷണ’ങ്ങൾക്കും പ്രാധാന്യം നൽകുകയാണ് ബിസിസിഐയും ഇന്ത്യൻ ടീമും. . മൂന്നാം ലോകകിരീടം ലക്ഷ്യമിടുന്ന ടീം ഇന്ത്യയെ സഹായിക്കാൻ ബിസിസിഐ സർവ്വ സന്നാഹങ്ങളും ഒരുക്കിക്കഴിഞ്ഞു.
അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന മുൻപത്തെ രണ്ട് വലിയ മത്സരങ്ങളിലും ഇന്ത്യ പരാജയപ്പെട്ടിരുന്നു (2023 ഏകദിന ലോകകപ്പ് ഫൈനലും ഈ വർഷത്തെ സൂപ്പർ 8 പോരാട്ടവും). അന്ന് താമസിച്ചിരുന്ന ഹോട്ടലിൽ നിന്ന് മാറി മറ്റൊരു ഹോട്ടലിലാണ് ഇത്തവണ ടീമിന് താമസം ഒരുക്കിയിരിക്കുന്നത്. ‘ലേഡി ലക്ക്’ കൂടെയുണ്ടാകാൻ വേണ്ടിയാണ് ഈ മാറ്റമെന്നാണ് സൂചന. നേരത്തെ സെമിഫൈനലിന് മുൻപ് ചന്ദ്രഗ്രഹണത്തിന്റെ “ദോഷഫലങ്ങൾ” ഒഴിവാക്കാൻ പരിശീലന സമയം 45 മിനിറ്റ് വൈകിപ്പിക്കുകയും ചെയ്തിരുന്നു.
ഫൈനലിനായി ഏത് തരം പിച്ച് വേണമെന്ന കാര്യത്തിൽ ചർച്ചകൾ സജീവമാണ്. കറുത്ത മണ്ണിലെ പിച്ചിൽ ദക്ഷിണാഫ്രിക്കയോട് തോറ്റ സാഹചര്യത്തിൽ, വാംഖഡെയിലേതു പോലെ ബാറ്റിംഗിന് അനുകൂലമായ ചുവന്ന മണ്ണിലെ പിച്ച് ഇന്ത്യ തിരഞ്ഞെടുത്തേക്കും. ബിസിസിഐ സിഇഒ ഹേമംഗ് അമിൻ നേരിട്ടെത്തി പിച്ച് പരിശോധനകൾ നടത്തി. നിലവിൽ ഒരു പ്രത്യേക പിച്ച് മറച്ചു വെച്ചിരിക്കുകയാണ്.
ഫൈനലിന് മുന്നോടിയായി ഏകദേശം ഒരു ലക്ഷത്തോളം വരുന്ന കാണികളെ ആവേശം കൊള്ളിക്കാൻ വമ്പൻ സംഗീത വിരുന്നാണ് ഐസിസി ഒരുക്കിയിരിക്കുന്നത്. പ്രശസ്ത പോപ്പ് താരം റിക്കി മാർട്ടിൻ തന്റെ ഹിറ്റ് ഗാനമായ ‘Un Dos Tres’ പാടും. മുംബൈയിൽ നിന്ന് അഹമ്മദാബാദിലേക്ക് ആരാധകരുടെ വൻ ഒഴുക്ക് കണക്കിലെടുത്ത് പശ്ചിമ റെയിൽവേ പ്രത്യേക ട്രെയിൻ സർവീസ് പ്രഖ്യാപിച്ചു. വിമാന ടിക്കറ്റ് നിരക്ക് കുതിച്ചുയരുന്ന സാഹചര്യത്തിൽ ആരാധകർക്ക് ഇത് വലിയ ആശ്വാസമാകും.
ടോസ് വളരെ നിർണായകമാകാൻ സാധ്യതയുള്ള പോരിൽ ടോസ് നേടുന്ന ടീം ഫീൽഡിങ് തിരഞ്ഞെടുക്കാനാണ് സാധ്യത.
