ടി20 ലോകകപ്പിലെ ചരിത്രവിജയത്തിന് പിന്നാലെ രാജ്യം മുഴുവൻ ആഘോഷത്തിമിർപ്പിലാണ്. താനത്തെ പോരാട്ടത്തിന് ശേഷം സോഷ്യൽ മീഡിയയിൽ ആരാധകരെ ആവേശത്തിലാഴ്ത്തിയിരിക്കുകയാണ് ഇന്ത്യൻ ടീമംഗങ്ങൾ. എന്തായാലും മൈതാനത്ത് ബാറ്റിംഗ് നിരയുടെ കുറ്റി തെറിപ്പിക്കുന്ന അതേ വേഗതയിൽ സോഷ്യൽ മീഡിയയിലും തീ പടർത്തുകയാണ് നമ്മുടെ സ്വന്തം ‘മിസ്റ്ററി സ്പിന്നർ’ വരുൺ ചക്രവർത്തി. ലോകകപ്പ് കിരീടം ഇന്ത്യ ഉയർത്തിയതിന് പിന്നാലെ ഇൻസ്റ്റാഗ്രാമിൽ വരുൺ പങ്കുവെച്ച ഒരു റീലാണ് ഇപ്പോൾ ഇന്റർനെറ്റിലെ ഹോട്ട് ടോപ്പിക്.
വെറുതെ ഒരു വിജയാഘോഷമല്ല വരുൺ നടത്തിയത്. മലയാളത്തിന്റെ ‘ആവേശം’ സിനിമയിലെ ഫഹദ് ഫാസിലിന്റെ രംഗൻ ചേട്ടനെ അങ്ങോട്ട് ആവാഹിച്ചു. “രംഗൻ ചേട്ടൻ കാണിക്കുമെന്ന് പറഞ്ഞാൽ കാണിക്കും!” എന്ന മാസ് ഡയലോഗിനൊപ്പം ആവേശം സിനിമയിലെ പാട്ടും വെച്ച് തകർപ്പൻ സ്റ്റെപ്പുകളുമായാണ് വരുൺ പ്രത്യക്ഷപ്പെട്ടത്. ഫഹദിന്റെ ആ പ്രത്യേക ഭാവങ്ങൾ വരുൺ അനുകരിക്കുന്നത് കണ്ടാൽ ആരും പറഞ്ഞുപോകും—”എടാ മോനേ… ഇത് വെറും റീലല്ല, റിയൽ ആവേശമാണ്!” എന്ന്.
എന്തായാലും വെറുതെ തുള്ളുകയല്ല, അതിനുള്ള അർഹത മൈതാനത്ത് വരുൺ തെളിയിച്ചിട്ടുണ്ട്. ഈ ലോകകപ്പിലെ ഇന്ത്യയുടെ കുതിപ്പിന് പിന്നിലെ രഹസ്യായുധമായിരുന്നു ഈ സ്പിന്നർ. ലോകത്തെ ഒന്നാം നമ്പർ ബൗളർ ജസ്പ്രീത് ബുംറയ്ക്കൊപ്പം 14 വിക്കറ്റുകൾ വീഴ്ത്തി ടൂർണമെന്റിലെ സംയുക്ത വിക്കറ്റ് വേട്ടക്കാരനായി വരുൺ മാറി.
എന്തായാലൂം സിനിമയിലെ രംഗൻ ചേട്ടൻ ബെംഗളൂരുവിനെ വിറപ്പിച്ചെങ്കിൽ, വരുൺ ചക്രവർത്തി ലോകകപ്പിനെയാണ് വിറപ്പിച്ചത്. വീഡിയോ പോസ്റ്റ് ചെയ്ത് മിനിറ്റുകൾക്കകം ലക്ഷക്കണക്കിന് ലൈക്കുകളും ഷെയറുകളുമാണ് ലഭിക്കുന്നത്. സഞ്ജു സാംസണിന്റെയും മറ്റ് താരങ്ങളുടെയും വിജയാഘോഷങ്ങൾക്കിടയിൽ വരുണിന്റെ ഈ ‘മലയാളി ടച്ച്’ മലയാളികൾ ഇരുകൈയും നീട്ടിയാണ് സ്വീകരിച്ചിരിക്കുന്നത്.
View this post on Instagram
