രൺവീർ സിംഗിനെ നായകനാക്കി ആദിത്യ ധർ സംവിധാനം ചെയ്ത ‘ധുരന്ധർ: ദ റിവഞ്ച്’ തിയേറ്ററുകളിൽ തകർത്തോടുമ്പോൾ സോഷ്യൽ മീഡിയയിൽ പുതിയൊരു ചർച്ചയ്ക്ക് തിരികൊളുത്തിയിരിക്കുകയാണ് ആരാധകർ. 2019-ൽ പുറത്തിറങ്ങിയ ബ്ലോക്ക്ബസ്റ്റർ ചിത്രം ‘ഉറി: ദ സർജിക്കൽ സ്ട്രൈക്കി’ന് ‘ധുരന്ധറു’മായി നേരിട്ട് ബന്ധമുണ്ടെന്ന കണ്ടെത്തലുകളാണ് ഇപ്പോൾ വൈറലാകുന്നത്. ചിത്രത്തിൽ രാകേഷ് ബേദി അവതരിപ്പിക്കുന്ന സമീൽ ജമാലി എന്ന കഥാപാത്രമാണ് ഈ സിനിമാറ്റിക് യൂണിവേഴ്സ് സിദ്ധാന്തത്തിന് ആധാരം. ‘ഉറി’യുടെ ക്രെഡിറ്റ് സീനുകളിലും ആഖ്യാനത്തിലും ഒളിപ്പിച്ചുവെച്ച ചില സൂചനകൾ വർഷങ്ങൾക്കിപ്പുറം ‘ധുരന്ധറി’ലൂടെ ആദിത്യ ധർ കൂട്ടിയിണക്കുകയാണെന്നാണ് എക്സ് (ട്വിറ്റർ) ഉൾപ്പെടെയുള്ള പ്ലാറ്റ്ഫോമുകളിൽ സിനിമാ പ്രേമികൾ വാദിക്കുന്നത്. ‘ക്ഷിതിജ് ക്രിട്ടിക്’ എന്ന യൂസർ പങ്കുവെച്ച വീഡിയോയിൽ ഉറിയിലെയും ധുരന്ധറിലെയും സാമ്യതകൾ വ്യക്തമാക്കുന്നുണ്ട്. ഏഴ് വർഷം മുൻപേ പ്ലാൻ ചെയ്ത ഇത്തരമൊരു ‘ഫോർഷാഡോയിംഗ്’ വൺ പീസ് പോലുള്ള വിശ്വപ്രസിദ്ധ ആനിമേഷൻ പരമ്പരകളിലെ ട്വിസ്റ്റുകളോടാണ് ആരാധകർ ഉപമിക്കുന്നത്. ഉറിയിൽ പരാമർശിക്കപ്പെടുന്ന ഇന്റലിജൻസ് ശൃംഖലയുടെ തുടർച്ചയാണ് പുതിയ ചിത്രത്തിലെ ഡബിൾ ഏജന്റ് വേഷമെന്ന് ഇവർ കരുതുന്നു.
മാർച്ച് 19-ന് തിയേറ്ററുകളിലെത്തിയ ചിത്രം ഇതിനോടകം തന്നെ 240 കോടിയിലധികം രൂപ കളക്ഷൻ നേടി ബോക്സ് ഓഫീസിൽ കുതിപ്പ് തുടരുകയാണ്. രൺവീർ സിംഗിന്റെ കരിയറിലെ തന്നെ ഏറ്റവും മികച്ച പ്രകടനങ്ങളിലൊന്നായി വാഴ്ത്തപ്പെടുന്ന ചിത്രത്തിൽ സഞ്ജയ് ദത്ത്, ആർ. മാധവൻ, അർജുൻ രാംപാൽ തുടങ്ങിയ വമ്പൻ താരനിര അണിനിരക്കുന്നുണ്ട്. കൂടാതെ അക്ഷയ് ഖന്നയുടെ ഫ്ലാഷ്ബാക്ക് രംഗങ്ങളും ആരാധകരെ ആവേശത്തിലാഴ്ത്തുന്നു. സാറാ അർജുൻ, ഡാനിഷ് പാണ്ഡോർ, സൗമ്യ ടണ്ടൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ഒരു ചാരവൃത്തി ത്രില്ലറായി ഒരുക്കിയ ‘ധുരന്ധർ’ ആദിത്യ ധറിന്റെ ഒരു വിപുലമായ സിനിമാറ്റിക് യൂണിവേഴ്സിന്റെ (ADCU) ഭാഗമാണോ എന്ന കാര്യത്തിൽ വരും ദിവസങ്ങളിൽ സംവിധായകന്റെ ഭാഗത്തുനിന്നുള്ള ഔദ്യോഗിക സ്ഥിരീകരണത്തിനായി കാത്തിരിക്കുകയാണ് സിനിമാ ലോകം.
