ന്യൂഡൽഹി : വിമാന ഇന്ധന വിലയിൽ ഉണ്ടായ വൻ വർദ്ധനവിനെ തുടർന്ന് ടിക്കറ്റുകൾക്ക് ഇന്ധന സർചാർജ് വർദ്ധിപ്പിച്ച് ഇൻഡിഗോ. ഏപ്രിൽ 2 മുതൽ വിമാന ടിക്കറ്റുകൾക്ക് 10,000 രൂപ വരെ ഇന്ധന സർചാർജ് ഏർപ്പെടുത്തുമെന്ന് ഇൻഡിഗോ പ്രഖ്യാപിച്ചു. ഏപ്രിൽ 2 പുലർച്ചെ 1 മണി മുതൽ ബുക്ക് ചെയ്യുന്ന ടിക്കറ്റുകൾക്കാണ് പുതുക്കിയ നിരക്ക് ബാധകമാകുക. അന്താരാഷ്ട്ര റൂട്ടുകളിൽ സർചാർജ് പരമാവധി 10,000 രൂപ വരെയായാണ് ഉയർത്തിയിരിക്കുന്നത്.
വിമാന ഇന്ധനമായ എടിഎഫിന്റെ (Aviation Turbine Fuel) വിലയിൽ 25 ശതമാനം വർദ്ധനവ് ഉണ്ടായതാണ് വിമാന ടിക്കറ്റുകൾക്ക് പ്രത്യേക സർചാർജ് ഏർപ്പെടുത്താൻ വിമാന കമ്പനികളെ പ്രേരിപ്പിച്ചിരിക്കുന്നത്. യാത്ര ചെയ്യുന്ന ദൂരത്തിനനുസരിച്ച് സർചാർജിൽ മാറ്റമുണ്ടാകും. 500 കിലോമീറ്ററിൽ താഴെ: ₹275,
500 – 1000 കിലോമീറ്റർ: ₹400,
1000 – 1500 കിലോമീറ്റർ: ₹600,
1500 – 2000 കിലോമീറ്റർ: ₹800,
2000 കിലോമീറ്ററിന് മുകളിൽ: ₹950 എന്നിങ്ങനെയാണ് ആഭ്യന്തര വിമാന സർവീസുകൾക്ക് വർദ്ധനവ് ഉണ്ടാവുക. അന്താരാഷ്ട്ര സർവീസുകൾക്ക്
ദൂരത്തിനനുസരിച്ച് ₹900 മുതൽ ₹10,000 വരെ അധിക സർചാർജ് ഈടാക്കും. യൂറോപ്പ്, യുകെ തുടങ്ങിയ ദീർഘദൂര റൂട്ടുകളിലായിരിക്കും 10,000 രൂപയുടെ ഉയർന്ന നിരക്ക് ബാധകമാകുക.
