ന്യൂഡൽഹി : ആം ആദ്മി പാർട്ടിയിൽ പുതിയ ആഭ്യന്തര കലഹം. രാജ്യസഭാ ഡെപ്യൂട്ടി ലീഡർ സ്ഥാനത്തുനിന്ന് നീക്കം ചെയ്തതിന് പിന്നാലെ എംപി രാഘവ് ഛദ്ദ നേതൃത്വത്തിനെതിരെ പരസ്യമായി രംഗത്തെത്തിയിരുന്നു. ഇപ്പോൾ രാഘവ് ഛദ്ദയുടെ വിമർശനങ്ങൾക്ക് മറുപടി നൽകിയിരിക്കുകയാണ് എഎപി. ‘പി ആർ വർക്ക് നിർത്തി ബിജെപിക്കെതിരെ സംസാരിക്ക്’ എന്ന് ആം ആദ്മി പാർട്ടി രാഘവ് ഛദ്ദയ്ക്ക് മറുപടി നൽകി.
“സോഫ്റ്റ് പി ആർ വർക്കുകൾ നിർത്തൂ, സഭയിൽ സമൂസയെക്കുറിച്ച് സംസാരിക്കാതെ ബിജെപിയെ ചോദ്യം ചെയ്യൂ” എന്നാണ് എഎപി നേതൃത്വം രാഘവ് ഛദ്ദക്കെതിരെ പരാമർശം നടത്തിയത്. വിമാനത്താവളങ്ങളിലെ ഭക്ഷണ സാധനങ്ങളുടെ (സമോസ ഉൾപ്പെടെയുള്ളവ) വില വർധനവിനെക്കുറിച്ച് രാഘവ് ഛദ്ദ രാജ്യസഭയിൽ ഉന്നയിച്ച പരാമർശങ്ങൾ ആയിരുന്നു ആം ആദ്മി പാർട്ടിയുടെ ഈ വിമർശനത്തിന് കാരണം. രാഘവ് ഛദ്ദ ബിജെപിയെ കുറിച്ചോ കേന്ദ്രസർക്കാരിനെ കുറിച്ചോ ഒരു പരാമർശവും നടത്തുന്നില്ല എന്നും ആം ആദ്മി പാർട്ടി നേതൃത്വം കുറ്റപ്പെടുത്തി.
