ഐപിഎൽ 2026-ലെ ആവേശകരമായ മത്സരത്തിൽ ഇന്ന് മുംബൈ ഇന്ത്യൻസ് രാജസ്ഥാൻ റോയൽസിനെ നേരിടാൻ ഒരുങ്ങുമ്പോൾ, എല്ലാവരും ഉറ്റുനോക്കുന്നത് 15 വയസ്സുകാരൻ വൈഭവ് സൂര്യവംശിയും ലോകോത്തര ബൗളർ ജസ്പ്രീത് ബുംറയും തമ്മിലുള്ള പോരാട്ടത്തിനാണ്. രാജസ്ഥാന്റെ ഓപ്പണറായ സൂര്യവംശിയെ തുടക്കത്തിലേ പുറത്താക്കാൻ ബുംറയെക്കൊണ്ട് തന്നെ ബൗളിംഗ് ഓപ്പൺ ചെയ്യിപ്പിക്കണമെന്ന് സൈമൺ ഡൗൾ അഭിപ്രായപ്പെട്ടു.
കഴിഞ്ഞ സീസണിൽ അരങ്ങേറ്റം കുറിച്ച സൂര്യവംശി ഇത്തവണയും തകർപ്പൻ ഫോമിലാണ്. ഈ സീസണിലെ ആദ്യ രണ്ട് മത്സരങ്ങളിൽ നിന്ന് 237.14 എന്ന തകർപ്പൻ സ്ട്രൈക്ക് റേറ്റിൽ 83 റൺസാണ് താരം അടിച്ചുകൂട്ടിയത്. “മുംബൈ കൃത്യമായ പ്ലാനിംഗുമായി വരികയാണെങ്കിൽ ബുംറയെക്കൊണ്ട് തന്നെ ബൗളിംഗ് തുടങ്ങണം. സൂര്യവംശിയുടെ ആത്മവിശ്വാസം തകർക്കാൻ മുംബൈയുടെ പക്കലുള്ള ഏറ്റവും മികച്ച ആയുധം ബുംറയാണ്.”
സീസണിലെ ആദ്യ രണ്ട് മത്സരങ്ങളിൽ വിക്കറ്റ് നേടാൻ ബുംറയ്ക്ക് സാധിച്ചിട്ടില്ലെങ്കിലും 7 എന്ന മികച്ച ഇക്കണോമി റേറ്റിലാണ് അദ്ദേഹം പന്തെറിയുന്നത്. മുൻ പേസർ പോമി എംബാങ്വ ബുംറയെ പിന്തുണച്ച് രംഗത്തെത്തി. ഡൽഹിയിൽ നടന്ന കഴിഞ്ഞ മത്സരത്തിൽ ബുംറ അത്ര മികച്ച പ്രകടനമല്ല കാഴ്ചവെച്ചതെന്നും അദ്ദേഹത്തിന് അത്ര താല്പര്യമില്ലാത്ത ഗ്രൗണ്ടാണതെന്നുമാണ് എംബാങ്വയുടെ നിരീക്ഷണം. എന്നാൽ ഇന്ന് ഗൗഹാത്തിയിൽ ബുംറ ശക്തമായി തിരിച്ചുവരുമെന്നും അദ്ദേഹം പ്രത്യാശിച്ചു.
വൈഭവ് സൂര്യവംശിയുടെ കളിയിൽ വന്ന മാറ്റങ്ങളെയും എംബാങ്വ പ്രശംസിച്ചു. കഴിഞ്ഞ സീസണിൽ യാതൊരു ഭയവുമില്ലാതെ കളിച്ചിരുന്ന താരം ഇത്തവണ കൂടുതൽ പക്വതയോടെയും നിയന്ത്രണത്തോടെയുമാണ് ബാറ്റ് ചെയ്യുന്നതെന്ന് അദ്ദേഹം പറഞ്ഞു. യശസ്വി ജയ്സ്വാളും സൂര്യവംശിയും ചേരുന്ന രാജസ്ഥാന്റെ ഓപ്പണിംഗ് ജോഡി മുംബൈയ്ക്ക് വലിയ ഭീഷണിയാണ്.
കളിച്ച രണ്ട് മത്സരങ്ങളിൽ രണ്ടിലും ജയിച്ച രാജസ്ഥാൻ പോയിന്റ് പട്ടികയിൽ മൂന്നാമതും ഒന്നിൽ ജയിക്കുകയും ഒന്നിൽ തോൽക്കുകയും ചെയ്ത മുംബൈ പോയിന്റ് പട്ടികയിൽ ആറാമതാണ്.
