കളിക്കളത്തിലും പുറത്തും തന്റെ തമാശ കലർന്ന മറുപടികൾ കൊണ്ട് എതിരാളികളെ നിശബ്ദനാക്കാറുള്ള എം.എസ്. ധോണിയുടെ ഒരു പഴയ വീഡിയോയാണ് ഇപ്പോൾ വീണ്ടും ചർച്ചയാകുന്നത്. ഇംഗ്ലണ്ട് ഇതിഹാസം കെവിൻ പീറ്റേഴ്സന് ധോണി നൽകിയ മറുപടി ക്രിക്കറ്റ് ചരിത്രത്തിലെ തന്നെ ഏറ്റവും മികച്ച ‘ബാൻറർ’ (Banter) നിമിഷങ്ങളിൽ ഒന്നാണ്.
ഒരു ഐപിഎൽ മത്സരത്തിനിടയിൽ കമെന്ററി ബോസ്കിൽ ഇരുന്ന പീറ്റേഴ്സൺ, ധോണിക്ക് അരികിലുണ്ടായിരുന്ന മനോജ് തിവാരിയോട് ഒരു കാര്യം പറഞ്ഞു. “ഞാൻ ധോണിയേക്കാൾ മികച്ച ഗോൾഫറാണെന്ന് അവനോട് ഒന്ന് പറയൂ,” എന്നായിരുന്നു പീറ്റേഴ്സന്റെ ആവശ്യം. എന്നാൽ ഇത് കേട്ട ധോണി ഒട്ടും വൈകാതെ തന്നെ പീറ്റേഴ്സന് മറുപടി നൽകി: “നീ ഇപ്പോഴും എന്റെ ആദ്യത്തെ ടെസ്റ്റ് വിക്കറ്റാണ്, അത് മറക്കണ്ട!”
2011-ൽ ലോർഡ്സിൽ നടന്ന ടെസ്റ്റ് മത്സരത്തിനിടയിലാണ് വിക്കറ്റ് കീപ്പിംഗ് ഗ്ലൗസ് അഴിച്ച് വെച്ച് ധോണി പന്തെറിയാൻ എത്തിയത്. അന്ന് പീറ്റേഴ്സണെ ധോണി ഔട്ടാക്കിയെങ്കിലും റിവ്യൂവിൽ അത് നോട്ട് ഔട്ട് ആയി മാറുകയായിരുന്നു. എന്നാൽ പീറ്റേഴ്സനെ കളിയാക്കാൻ ധോണി എപ്പോഴും ഈ വിക്കറ്റിനെക്കുറിച്ച് ഓർമ്മിപ്പിക്കാറുണ്ട്.
ധോണിയുടെ ഈ മറുപടി കേട്ട് പീറ്റേഴ്സണും ബോക്സിൽ ഉണ്ടായിരുന്ന മറ്റുള്ളവരും ചിരിച്ചുപോയി. വിക്കറ്റിന് പിന്നിലെ സൂത്രധാരൻ എന്നതിലുപരി സന്ദർഭത്തിനനുസരിച്ച് നർമ്മം കലർന്ന മറുപടികൾ നൽകുന്നതിലും ധോണി മിടുക്കനാണെന്ന് ഈ നിമിഷം ഒരിക്കൽ കൂടി തെളിയിക്കുന്നു.
