ഇന്ത്യൻ ക്രിക്കറ്റ് ടീമിന്റെ നായകസ്ഥാനം എം.എസ് ധോണി ഏറ്റെടുത്തപ്പോൾ മുതിർന്ന താരങ്ങൾക്കിടയിൽ വിയോജിപ്പുകളോ ഭിന്നതയോ ഉണ്ടായിരുന്നുവെന്ന പ്രചാരണങ്ങൾ തള്ളി മുൻ സ്പിന്നർ ഹർഭജൻ സിംഗ്. യുവരാജ് സിംഗ്, വിരേന്ദർ സെവാഗ് തുടങ്ങിയ പ്രമുഖ താരങ്ങളെ മറികടന്ന് 26-ാം വയസ്സിൽ ധോണി ക്യാപ്റ്റനായത് ടീമിനുള്ളിൽ അസ്വാരസ്യങ്ങൾ ഉണ്ടാക്കിയില്ലെന്ന് അദ്ദേഹം വ്യക്തമാക്കി.
ഓരോ കളിക്കാരനിൽ നിന്നും ഏറ്റവും മികച്ച പ്രകടനം പുറത്തെടുക്കാൻ ധോണിക്ക് പ്രത്യേക കഴിവുണ്ടായിരുന്നുവെന്നും മൂന്ന് ഐ.സി.സി കിരീടങ്ങൾ ഇന്ത്യ സ്വന്തമാക്കിയത് കൂട്ടായ പരിശ്രമത്തിന്റെ ഫലമാണെന്നും ഹർഭജൻ നിരീക്ഷിച്ചു.
സൗരവ് ഗാംഗുലിയുടെ നേതൃത്വത്തിൽ കെട്ടിപ്പടുത്ത പരിചയസമ്പന്നരായ ഒരു സംഘം കളിക്കാരാണ് ധോണിക്ക് ലഭിച്ചതെന്ന് ഒരു അഭിമുഖത്തിൽ സംസാരിക്കവേ ഹർഭജൻ ഓർമ്മിപ്പിച്ചു. ധോണിയുടെ പ്രായക്കുറവ് മുതിർന്ന താരങ്ങൾക്ക് ഒരിക്കലും ഒരു പ്രശ്നമായിരുന്നില്ലെന്നും, ഒരു നായകൻ എന്ന നിലയിൽ വിജയിക്കാൻ പതിനൊന്ന് കളിക്കാരുടെയും പിന്തുണ അത്യാവശ്യമാണെന്ന് ടീമിന് ബോധ്യമുണ്ടായിരുന്നുവെന്നും അദ്ദേഹം പറഞ്ഞു.
കളിക്കാരുടെ മേൽ അധികാരം അടിച്ചേൽപ്പിക്കാതെ, വ്യത്യസ്ത സാഹചര്യങ്ങളിൽ അവരവരുടെ കഴിവുകൾക്കനുസരിച്ച് കളിക്കാൻ ധോണി സ്വാതന്ത്ര്യം നൽകിയിരുന്നു. 2007-ലെ ട്വന്റി-20 ലോകകപ്പിലും 2011-ലെ ഏകദിന ലോകകപ്പിലും ഇന്ത്യ മുത്തമിട്ടപ്പോൾ ടീമിലെ പ്രധാന സാന്നിധ്യമായിരുന്നു ഹർഭജൻ സിംഗ്.
