ക്രിക്കറ്റ് ലോകത്തെ ഏറ്റവും മികച്ച പേസ് ബൗളറെന്ന് പേരുകേട്ട ജസ്പ്രീത് ബുംറയ്ക്ക് ഐപിഎൽ 2026-ൽ ഇതുവരെ ഒരു വിക്കറ്റ് പോലും നേടാനായിട്ടില്ല. ആദ്യ മത്സരം ജയിച്ചതിന് ശേഷം തുടർച്ചയായ നാല് തോൽവികളുമായി മുംബൈ ഇന്ത്യൻസ് കടുത്ത പ്രതിസന്ധിയിലുമാണ്. എന്നാൽ ബുംറ മോശം ഫോമിലൂടെയാണ് കടന്നുപോകുന്നതെന്ന വിമർശനങ്ങളെ പൂർണ്ണമായും തള്ളിക്കളയുകയാണ് മുംബൈ കോച്ച് മഹേല ജയവർധനെ.
പവർപ്ലേയിൽ വിക്കറ്റ് വീഴ്ത്താൻ മറ്റ് ബൗളർമാർക്ക് കഴിയാത്തതാണ് ബുംറയ്ക്ക് തിരിച്ചടിയാകുന്നതെന്ന് ജയവർധനെ ചൂണ്ടിക്കാട്ടി. ദീപക് ചാഹർ, ട്രെന്റ് ബോൾട്ട് തുടങ്ങിയ മികച്ച പവർപ്ലേ ബൗളർമാർ ടീമിലുണ്ടെങ്കിലും തുടക്കത്തിൽ വിക്കറ്റ് വീഴ്ത്താൻ അവർക്ക് കഴിയുന്നില്ല. ഇതിനാൽ തന്നെ, ബുംറ പന്തെറിയാൻ വരുമ്പോൾ വിക്കറ്റ് കളയാതെ സൂക്ഷിച്ച് കളിക്കാനാണ് എതിർ ടീമിലെ ബാറ്റർമാർ ശ്രമിക്കുന്നത്.
“ബുംറ നന്നായി തന്നെയാണ് പന്തെറിയുന്നത്. എന്നാൽ പവർപ്ലേയിൽ എതിരാളികൾക്ക് മേൽ സമ്മർദ്ദം ചെലുത്താൻ നമുക്ക് കഴിയുന്നില്ല. ബുംറയ്ക്കെതിരെ വലിയ റിസ്ക് എടുക്കേണ്ടതില്ലെന്ന് ബാറ്റർമാർക്ക് അറിയാം. ചില വ്യത്യസ്തമായ തന്ത്രങ്ങൾ ബുംറ പരീക്ഷിക്കുന്നുണ്ടെങ്കിലും എതിരാളികൾ മികച്ച രീതിയിലാണ് ബാറ്റ് ചെയ്യുന്നത്. ഒരു പ്രത്യേക കാരണം കൊണ്ടാണ് അവന് വിക്കറ്റ് ലഭിക്കാത്തതെന്ന് പറയാനാകില്ല, എന്നാൽ ഒരു ബൗളിംഗ് യൂണിറ്റെന്ന നിലയിൽ എതിരാളികളെ തകർക്കുന്നതിൽ നമ്മൾ പരാജയപ്പെട്ടു,” ജയവർധനെ മാധ്യമപ്രവർത്തകരോട് പറഞ്ഞു.
ഈ മോശം സമയത്തെ മറികടന്ന് ബുംറ ശക്തമായി തിരിച്ചുവരുമെന്ന് കോച്ച് ഉറപ്പുനൽകി. ഒരു വിക്കറ്റ് ലഭിച്ചുതുടങ്ങിയാൽ പിന്നെ ഈ സീസണിൽ ബുംറയെ തടയാൻ ആർക്കുമാകില്ലെന്ന് അദ്ദേഹം പറഞ്ഞു. ബുംറയെ മാത്രം ആശ്രയിക്കാതെ ടീമിലെ മറ്റ് ബൗളർമാരും ഉത്തരവാദിത്തം പങ്കിടണം. പരിക്കുകളും അസുഖങ്ങളും കാരണം പല പ്രധാന താരങ്ങളെയും ഗ്രൗണ്ടിലിറക്കാൻ കഴിയാത്തതും മുംബൈയ്ക്ക് വലിയ തിരിച്ചടിയായതായി അദ്ദേഹം കൂട്ടിച്ചേർത്തു.
നേരത്തെ, മോശം ക്യാപ്റ്റൻസിയുടെ പേരിൽ വലിയ വിമർശനങ്ങൾ നേരിടുന്ന ഹാർദിക് പാണ്ഡ്യയെയും ജയവർധനെ പിന്തുണച്ചിരുന്നു.
