പാകിസ്താനിൽ ഇന്ത്യ തേടുന്ന ഭീകരർ ഒന്നൊന്നായി അജ്ഞാതരാൽ കൊല്ലപ്പെടുന്നത് തുടരുന്നു. മുംബൈ ഭീകരാക്രമണത്തിന്റെ മുഖ്യസൂത്രധാരനും ലഷ്കർ-ഇ-തൊയ്ബ (LeT) തലവനുമായ ഹാഫിസ് സയീദിന്റെ വിശ്വസ്തനും ലഷ്കറിലെ പ്രധാനിയുമായ ഷെയ്ഖ് യൂസഫ് അഫ്രീദിയാണ് ഖൈബർ പഖ്തുൻഖ്വയിൽ വെടിയേറ്റു മരിച്ചത്. ഞായറാഴ്ച (2026 ഏപ്രിൽ 26) ലാൻഡി കോട്ടലിൽ വെച്ചാണ് അജ്ഞാതരായ തോക്കുധാരികൾ അഫ്രീദിക്ക് നേരെ തുരുതുരാ വെടിയുതിർത്തത്. അക്രമികൾ ഉടൻ തന്നെ സംഭവസ്ഥലത്തുനിന്ന് രക്ഷപ്പെട്ടു.
ലഷ്കർ-ഇ-തൊയ്ബയുടെ റിക്രൂട്ട്മെന്റിലും ഭീകരപ്രവർത്തനങ്ങൾ ഏകോപിപ്പിക്കുന്നതിലും നിർണ്ണായക പങ്കുവഹിച്ചിരുന്ന വ്യക്തിയായിരുന്നു അഫ്രീദി. ഖൈബർ പഖ്തുൻഖ്വ മേഖലയിൽ സംഘടനയുടെ സ്വാധീനം വർദ്ധിപ്പിക്കുന്നതിൽ ഇയാൾ മുൻപന്തിയിലുണ്ടായിരുന്നു. നിരോധിത സംഘടനയായ ജമാഅത്ത്-ഉദ്-ദവയിലെ (JuD) പ്രമുഖനായും അഫ്രീദി അറിയപ്പെട്ടിരുന്നു. സലാഫി പണ്ഡിതൻ എന്ന വ്യാജേന ഭീകരപ്രവർത്തനങ്ങൾക്ക് ആശയപരമായ അടിത്തറ പാകുകയായിരുന്നു ഇയാളുടെ രീതി.
കഴിഞ്ഞ ഒരു വർഷത്തിനിടെ പാകിസ്താനിൽ കൊല്ലപ്പെടുന്ന ലഷ്കർ ഭീകരരുടെ നിരയിൽ ഏറ്റവും ഒടുവിലത്തെ കണ്ണിയാണ് ഷെയ്ഖ് യൂസഫ് അഫ്രീദി. ഏതാനും ദിവസങ്ങൾക്ക് മുൻപ് ലാഹോറിൽ വെച്ച് ലഷ്കർ സ്ഥാപക നേതാക്കളിലൊരാളായ അമീർ ഹംസയ്ക്ക് നേരെയും സമാനമായ രീതിയിൽ ആക്രമണമുണ്ടായിരുന്നു. വെടിയേറ്റ ഹംസ നിലവിൽ ഗുരുതരാവസ്ഥയിൽ ചികിത്സയിലാണ്. ഹാഫിസ് സയീദിന് ശേഷം ലഷ്കറിലെ ഏറ്റവും സ്വാധീനമുള്ള നേതാവാണ് ഹംസ.
ഹാഫിസ് സയീദ് നിലവിൽ ടെറർ ഫണ്ടിംഗ് കേസുകളിൽ ശിക്ഷിക്കപ്പെട്ട് ലാഹോറിലെ കോട്ട് ലഖ്പത് ജയിലിലാണ്. സയീദിന്റെ അടുത്ത അനുയായികൾ ഓരോരുത്തരായി കൊല്ലപ്പെടുന്നത് പാകിസ്ഥാനിലെ ഭീകരസംഘടനകൾക്കിടയിൽ വലിയ പരിഭ്രാന്തി സൃഷ്ടിച്ചിട്ടുണ്ട്. ആക്രമണത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ലെങ്കിലും പാക് താലിബാൻ (TTP) പോലുള്ള ഗ്രൂപ്പുകളുമായുള്ള ആഭ്യന്തര തർക്കമാണോ ഇതിന് പിന്നിലെന്ന് പോലീസ് അന്വേഷിക്കുന്നുണ്ട്. ഇന്ത്യൻ ഏജൻസികൾ തിരയുന്ന ഭീകരർ പാകിസ്താനിലെ സുരക്ഷിത താവളങ്ങളിൽ വെച്ച് ഇല്ലാതാകുന്നത് അന്താരാഷ്ട്ര തലത്തിലും വലിയ ചർച്ചയായിരിക്കുകയാണ്.
