കണ്ണൂർ അഞ്ചരക്കണ്ടി ഡെൻറൽ കോളേജിലെ വിദ്യാർത്ഥി നിതിൻ രാജിൻറെ മരണത്തിൽ പ്രതിഷേധിച്ച് ആക്ഷൻ കൗൺസിൽ ആഹ്വാനം ചെയ്ത ഹർത്താലിൽ സംസ്ഥാനത്ത് വിവിധ സ്ഥലങ്ങളിൽ പ്രതിഷേധം ശക്തം. സമരാനുകൂലികൾ വാഹനങ്ങൾ തടഞ്ഞതോടെ പലയിടങ്ങളിലും ഗതാഗതകുരുക്കുണ്ടായി. പല സ്ഥലങ്ങളിലും കടകൾ നിർബന്ധിച്ച് അടപ്പിക്കുകയും സഹകരിക്കാത്തവരെ ഭീഷണിപ്പെടുത്തുകയും ചെയ്യുന്ന സാഹചര്യം ഉണ്ടായി.
തിരുവനന്തപുരത്ത് നിന്നുള്ള ഒരു വീഡിയോ സോഷ്യൽ മീഡിയയിൽ വൈറലാകുന്നുണ്ട്. നിർബന്ധിച്ച് കട അടപ്പിക്കാനെത്തിയവരോട് താൻ കട അടക്കാൻ പോകുകയാണെന്ന് ഉടമ മര്യാദക്ക് പറയുന്നുണ്ട്. അതിനിടയിലും സമരത്തെ അനുകൂലിക്കുന്നവർ ഭീഷണിപ്പെടുത്തുന്ന സംസാരവും മോശം പദ പ്രയോഗവും നടത്തിയതോടെ ഉടമയും വിട്ടുകൊടുത്തില്ല. പെട്ടെന്നുതന്നെ പൊലീസ് ഉദ്യോഗസ്ഥർ സ്ഥലത്ത് വന്നിട്ട് സമരാനുകൂലികളെ മാറ്റുക ആയിരുന്നു. പോകും വഴി ഉടമയെക്കുറിച്ച് ” അവൻ കഞ്ചാവാടാ” എന്ന് ആരോ പറഞ്ഞതിന് പിന്നാലെ ” കഞ്ചാവ് നിന്റെ മറ്റവൻ”എന്ന മറുപടിയാണ് യുവാവ് നൽകിയത്.
അതേസമയം ഹർത്താലിനെതിരെ ഹൈക്കോടതി സ്വമേധയ കേസ് എടുത്തു. ഹർത്താൽ ആഹ്വാനം ചെയ്തവർക്ക് നോട്ടീസ് നൽകി. ഇന്ന് വൈകിട്ട് ഡിജിപിയോട് റിപ്പോർട്ട് സമർപ്പിക്കാൻ നിർദേശം നൽകി.
