എട്ട് മത്സരങ്ങളിൽ ആറെണ്ണത്തിലും തോൽവി വഴങ്ങിയ മുംബൈ ഇന്ത്യൻസിന്റെ (MI) ഐപിഎൽ 2026 പ്ലേ ഓഫ് പ്രതീക്ഷകൾ തുലാസിലാണ്. കഴിഞ്ഞ മത്സരത്തിൽ സൺറൈസേഴ്സ് ഹൈദരാബാദിനെതിരെ (SRH) 243 റൺസ് പ്രതിരോധിക്കാൻ കഴിയാതിരുന്നതോടെ നായകൻ ഹാർദിക് പാണ്ഡ്യയുടെ ക്യാപ്റ്റൻസി വലിയ രീതിയിൽ ചോദ്യം ചെയ്യപ്പെടുകയാണ്.
ബാറ്റിംഗിലും ബൗളിംഗിലും ഹാർദിക് പരാജയപ്പെടുന്നതും വിമർശനങ്ങൾക്ക് ആക്കം കൂട്ടുന്നു. എന്നാൽ ഹാർദിക്കിനെ മാത്രം കുറ്റപ്പെടുത്തിയിട്ട് കാര്യമില്ലെന്നും ടീമിലെ മറ്റ് സൂപ്പർ താരങ്ങളും ഈ തകർച്ചയുടെ ഉത്തരവാദിത്തം ഏൽക്കണമെന്നും മുൻ വെസ്റ്റ് ഇൻഡീസ് ഇതിഹാസവും കമന്റേറ്ററുമായ ഇയാൻ ബിഷപ്പ് പറഞ്ഞു. എൻഡിടിവിയുടെ (NDTV) ചോദ്യത്തോട് പ്രതികരിക്കവെയാണ് ഇയാൻ ബിഷപ്പ് മുംബൈയുടെ പ്രശ്നങ്ങളെക്കുറിച്ച് സംസാരിച്ചത്.
“മുംബൈയുടെ പരാജയങ്ങൾക്ക് ഒരാളെ മാത്രം കുറ്റപ്പെടുത്താനാവില്ല. തന്റെ ഫോം വീണ്ടെടുക്കേണ്ടതുണ്ടെന്ന് ഹാർദിക് തന്നെ സമ്മതിച്ചതാണ്. തന്ത്രപരമായി അവന് ചില മാറ്റങ്ങൾ വരുത്താമെങ്കിലും, ടീമിലെ മറ്റ് വലിയ താരങ്ങൾ മികച്ച പ്രകടനം പുറത്തെടുക്കേണ്ടതുണ്ട്. ക്യാപ്റ്റൻ എന്ന നിലയിൽ നിങ്ങൾക്ക് കൃത്യമായ പദ്ധതികളുണ്ടാകാം, എന്നാൽ കളിക്കാർ അത് നടപ്പിലാക്കുന്നില്ലെങ്കിൽ നിങ്ങൾ പ്രതിസന്ധിയിലാകും. പൊള്ളാർഡോ മഹേല ജയവർധനെയോ പറഞ്ഞതുപോലെ, എല്ലാവർക്കും ഇതിൽ പങ്കുണ്ട്. ഒരാൾ മാത്രം പഴി കേൾക്കേണ്ടതില്ല,” ബിഷപ്പ് വ്യക്തമാക്കി.
മുംബൈയുടെ സീനിയർ താരങ്ങളുടെ മോശം ഫോം വലിയ ആശങ്കയാണ് സൃഷ്ടിക്കുന്നത്. വെടിക്കെട്ട് വീരൻ സൂര്യകുമാർ യാദവ് എട്ട് മത്സരങ്ങളിൽ നിന്ന് 20 ശരാശരിയിൽ വെറും 162 റൺസാണ് ഇതുവരെ നേടിയത്. മറുവശത്ത്, സ്റ്റാർ പേസർ ജസ്പ്രീത് ബുമ്ര തന്റെ ഐപിഎൽ കരിയറിലെ തന്നെ ഏറ്റവും മോശം സീസണിലൂടെയാണ് കടന്നുപോകുന്നത്. എട്ട് മത്സരങ്ങളിൽ നിന്ന് വെറും രണ്ട് വിക്കറ്റുകൾ മാത്രമാണ് താരത്തിന് വീഴ്ത്താനായത്.
നാട്ടിൽ നടന്ന 2026 ലെ ടി20 ലോകകപ്പ് വിജയത്തിന് ശേഷം ബുമ്രയെയും സൂര്യകുമാറിനെയും പോലുള്ള താരങ്ങൾക്ക് വിശ്രമം നൽകണമായിരുന്നുവെന്നും ബിഷപ്പ് അഭിപ്രായപ്പെട്ടു. “ലോകകപ്പ് നേടാൻ അവർ എത്രമാത്രം ഊർജ്ജം ചെലവഴിച്ചുകാണുമെന്ന് എനിക്ക് ഊഹിക്കാനാകും. അത് അവരെ ശാരീരികമായി തളർത്തിയിട്ടുണ്ടാകും. പ്രത്യേകിച്ചും ബുമ്രയെപ്പോലുള്ള താരങ്ങൾക്ക് വിശ്രമിക്കാനും, അവരുടെ കഴിവുകൾക്ക് മൂർച്ച കൂട്ടാനും കുറച്ച് സമയം നൽകണമായിരുന്നു എന്നാണ് ഞാൻ കരുതുന്നത്.”
ഐപിഎൽ 2026 പ്ലേ ഓഫിലേക്ക് യോഗ്യത നേടണമെങ്കിൽ മുംബൈ ഇന്ത്യൻസിന് ഇനി ശേഷിക്കുന്ന ആറ് മത്സരങ്ങളിലും നിർബന്ധമായും വിജയിക്കേണ്ടതുണ്ട്. വലിയ അത്ഭുതങ്ങൾ സംഭവിച്ചാൽ മാത്രമേ മുംബൈയ്ക്ക് ഇനി മുന്നേറാൻ സാധിക്കൂ.
