ഭാരതത്തിന്റെ രാഷ്ട്രീയ ഭൂപടത്തെ അടിമുടി മാറ്റിവരച്ചുകൊണ്ട് 2026-ലെ നിയമസഭാ തിരഞ്ഞെടുപ്പ് ഫലങ്ങൾ പുറത്തുവരുമ്പോൾ പ്രതിപക്ഷ നിരയിലെ അതികായന്മാർക്ക് കനത്ത തിരിച്ചടി. പശ്ചിമ ബംഗാളിൽ മമത ബാനർജിയും തമിഴ്നാട്ടിൽ എം.കെ. സ്റ്റാലിനും കേരളത്തിൽ പിണറായി വിജയനും അധികാരത്തിന് പുറത്തേക്ക് പോകുന്നുവെന്ന വ്യക്തമായ സൂചനകളാണ് വോട്ടെണ്ണൽ കേന്ദ്രങ്ങളിൽ നിന്ന് ലഭിക്കുന്നത്.
വിഘടനവാദത്തിന്റെയും കുടുംബവാഴ്ചയുടെയും രാഷ്ട്രീയത്തെ തള്ളിക്കളഞ്ഞ് ദേശീയതയുടെയും സുസ്ഥിര വികസനത്തിന്റെയും പാതയിലേക്ക് ഭാരതം ചുവടുവെക്കുന്ന കാഴ്ചയാണിപ്പോൾ. പശ്ചിമ ബംഗാളിൽ ചരിത്രത്തിലാദ്യമായി ഭാരതീയ ജനതാ പാർട്ടി അധികാരത്തിലേക്ക് കുതിക്കുകയാണ്. തൃണമൂലിന്റെ 15 വർഷത്തെ ആധിപത്യത്തിന് അന്ത്യം കുറിച്ചുകൊണ്ട് ‘സോനാർ ബംഗ്ലാ’ എന്ന ലക്ഷ്യത്തിലേക്ക് കാവിപ്പട അടുക്കുകയാണ്. നന്ദിഗ്രാമിലും ഭവാനിപ്പൂരിലും മമത ബാനർജി നേരിടുന്ന കനത്ത വെല്ലുവിളി തൃണമൂൽ ക്യാമ്പിനെ തളർത്തിക്കഴിഞ്ഞു. അഴിമതിക്കും പ്രീണനത്തിനുമെതിരെയുള്ള ബംഗാൾ ജനതയുടെ പോരാട്ടമാണിതെന്ന് സുവേന്ദു അധികാരി പ്രതികരിച്ചു.
തമിഴ്നാട്ടിൽ ദ്രാവിഡ രാഷ്ട്രീയത്തിന്റെ പരമ്പരാഗത രീതികളെ തകർത്തെറിഞ്ഞ് നടൻ വിജയന്റെ തമിഴക വെട്രി കഴകം (TVK) ഏറ്റവും വലിയ ഒറ്റക്കക്ഷിയായി മാറുന്ന അവിശ്വസനീയ കാഴ്ചയാണ് കാണുന്നത്. മുഖ്യമന്ത്രി സ്റ്റാലിന്റെ ഡിഎംകെ മൂന്നാം സ്ഥാനത്തേക്ക് പിന്തള്ളപ്പെട്ടത് ദ്രാവിഡ കക്ഷികളുടെ കുടുംബവാഴ്ചാ രാഷ്ട്രീയത്തിനേറ്റ കനത്ത പ്രഹരമാണ്. കേരളത്തിലാകട്ടെ, അഴിമതി ആരോപണങ്ങളിലും വികസന മുരടിപ്പിലും ഉലഞ്ഞ പിണറായി വിജയന്റെ ഇടതുപക്ഷത്തിന് ജനങ്ങൾ ചുവപ്പുകാർഡ് കാണിച്ചിരിക്കുകയാണ്.
കോൺഗ്രസ് നയിക്കുന്ന യുഡിഎഫ് വലിയ ഭൂരിപക്ഷത്തിലേക്ക് നീങ്ങുമ്പോൾ, അരനൂറ്റാണ്ടിന് ശേഷം ഇന്ത്യ ഇടതുമുക്തമാകുന്നു എന്ന പ്രത്യേകതയും ഇത്തവണയുണ്ട്. 140 സീറ്റുകളിൽ 100-ലധികം സീറ്റുകൾ യുഡിഎഫ് നേടുമെന്ന് കെപിസിസി അധ്യക്ഷൻ സണ്ണി ജോസഫ് ആത്മവിശ്വാസം പ്രകടിപ്പിച്ചു. അസമിൽ ഹിമന്ത ബിശ്വ ശർമ്മയുടെ കരുത്തിൽ ബിജെപി മൂന്നാം തവണയും ഭരണമുറപ്പിച്ചു. വടക്കുകിഴക്കൻ സംസ്ഥാനങ്ങളിൽ ബിജെപി നടത്തുന്ന വികസന കുതിപ്പിന് ജനങ്ങൾ നൽകിയ അംഗീകാരമാണിത്.
ഡൽഹിയിൽ കെജ്രിവാളിനെയും ബിഹാറിൽ നിതീഷ് കുമാറിനെയും നേരിട്ട അതേ കരുത്തോടെ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള എൻഡിഎ ഇന്ത്യയിലുടനീളം തങ്ങളുടെ സ്വാധീനം വർധിപ്പിക്കുകയാണ്. ഒരൊറ്റ ഭാരതം, ഉത്തമ ഭാരതം എന്ന ലക്ഷ്യത്തിലേക്കുള്ള പ്രയാണത്തിൽ ഈ വിജയങ്ങൾ ബിജെപിക്ക് കരുത്തുപകരും. വരും മണിക്കൂറുകളിൽ ഔദ്യോഗിക പ്രഖ്യാപനങ്ങൾ വരുന്നതോടെ ഇന്ത്യയുടെ രാഷ്ട്രീയ ചരിത്രം തിരുത്തപ്പെടും.
