പശ്ചിമ ബംഗാൾ നിയമസഭാ തിരഞ്ഞെടുപ്പിൽ മമത ബാനർജിയുടെ ഉറച്ച കോട്ടയായ ഭവാനിപ്പൂർ ഉൾപ്പെടെ ബിജെപി പിടിച്ചെടുത്തതിന് പിന്നാലെ പ്രതികരണവുമായി ‘ദി കശ്മീർ ഫയൽസ്’ സംവിധായകൻ വിവേക് അഗ്നിഹോത്രി. മമത ബാനർജി തന്നെയും തന്റെ സിനിമകളെയും ബംഗാളിൽ തടയാൻ ശ്രമിച്ചുവെന്നും എന്നാൽ ജനവിധിയിലൂടെ അതിന് മറുപടി ലഭിച്ചുവെന്നും അദ്ദേഹം ഇൻസ്റ്റാഗ്രാമിൽ കുറിച്ചു.
മമത ബാനർജി തന്നെ ബംഗാളിൽ നിന്ന് പൂർണ്ണമായും ഒഴിവാക്കാൻ ശ്രമിച്ചുവെന്നാണ് വിവേക് അഗ്നിഹോത്രി ആരോപിക്കുന്നത്. കശ്മീരി പണ്ഡിറ്റുകളുടെ പലായനം പ്രമേയമായ ഈ ചിത്രം റിലീസിന് പിന്നാലെ ബംഗാളിലെ തിയേറ്ററുകളിൽ നിന്ന് മമതയുടെ നിർദ്ദേശപ്രകാരം മാറ്റിയെന്നും തന്നെ ബംഗാളിൽ പ്രവേശിക്കാൻ അനുവദിക്കില്ലെന്ന് അവർ പറഞ്ഞതായും അദ്ദേഹം ആരോപിക്കുന്നു. 2025 സെപ്റ്റംബറിൽ റിലീസ് ചെയ്ത ഈ ചിത്രം ബംഗാളിൽ പൂർണ്ണമായും നിരോധിച്ചു. ചിത്രത്തിന്റെ ട്രെയിലർ ലോഞ്ച് തടയുകയും തനിക്കും സംഘത്തിനും നേരെ ആക്രമണങ്ങൾ ഉണ്ടാവുകയും ചെയ്തു.
തനിക്കെതിരെ ഡസൻ കണക്കിന് എഫ്ഐആറുകൾ (FIR) ബംഗാളിൽ ഫയൽ ചെയ്തിരുന്നുവെന്ന് വിവേക് അഗ്നിഹോത്രി വെളിപ്പെടുത്തി. ഗവർണറുടെ കയ്യിൽ നിന്ന് പുരസ്കാരം വാങ്ങാൻ പോലും തന്നെ അനുവദിക്കാത്ത സാഹചര്യമാണ് ഉണ്ടായിരുന്നത്. എന്നാൽ തിരഞ്ഞെടുപ്പ് സമയത്ത് ‘ദി ബംഗാൾ ഫയൽസ്’ രഹസ്യമായി ജനങ്ങളിലേക്ക് എത്തിക്കാൻ കഴിഞ്ഞുവെന്നും അദ്ദേഹം കൂട്ടിച്ചേർത്തു.
2025 സെപ്റ്റംബർ 5-നാണ് ഈ ചിത്രം പുറത്തിറങ്ങിയത്. 1946-ലെ ‘ഡയറക്ട് ആക്ഷൻ ഡേ’യും (Direct Action Day) നോഖാലി കലാപവുമാണ് ചിത്രത്തിന്റെ പശ്ചാത്തലം. ഭയമില്ലാതെ തലയുയർത്തി നടക്കാൻ ബംഗാളിലെ ജനങ്ങൾക്ക് ഇനി സാധിക്കുമെന്നും ഈ വിജയം അഭൂതപൂർവ്വമാണെന്നും പറഞ്ഞാണ് വിവേക് അഗ്നിഹോത്രി തന്റെ കുറിപ്പ് അവസാനിപ്പിച്ചത്.
