ഉത്തരകൊറിയൻ ഭരണാധികാരി കിം ജോങ് ഉന്നുമായി താൻ ഇപ്പോഴും ഊഷ്മളമായ നല്ല സൗഹൃദത്തിലാണ് ഉള്ളതെന്ന് വ്യക്തമാക്കി യുഎസ് പ്രസിഡന്റ് [ഡോണൾഡ് ട്രംപ്. കിമ്മിനൊപ്പം പാൻമുൻ ജോമിൽ വെച്ച് എടുത്ത പഴയ ചിത്രം സ്വന്തം സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിൽപങ്കുവെച്ചാണ് ട്രംപ് പുതിയ പ്രസ്താവനയുമായി രംഗത്തെത്തിയത്.
“ഈ ചിത്രത്തിൽ ഞങ്ങൾ രണ്ടുപേരും ഒട്ടും സൗഹൃദമില്ലാത്ത രീതിയിലാണ് നോക്കുന്നതെങ്കിലും, ഞങ്ങൾ രണ്ടുപേരും ചിരിച്ചുനിൽക്കുന്ന നിരവധി ചിത്രങ്ങൾ വേറെയുമുണ്ട്. കിം ജോങ് ഉന്നും ഞാനും വളരെ നല്ല സൗഹൃദത്തിലാണ്” – ട്രംപ് കുറിപ്പിൽ വ്യക്തമാക്കി. 2019-ൽ കൊറിയൻ അതിർത്തി ഗ്രാമമായ പാൻമുൻ ജോമിലെ ഡിസൈനറ്റഡ് മേഖലയിൽ വെച്ച് ഇരുവരും നടത്തിയ ചരിത്രപ്രസിദ്ധമായ കൂടിക്കാഴ്ചയുടെ ചിത്രമാണ് ട്രംപ് ഇൻസ്റ്റാഗ്രാമിന് സമാനമായി പോസ്റ്റ് ചെയ്തത്.
അമേരിക്കയും ദക്ഷിണ കൊറിയയും സംയുക്തമായി നടത്താൻ നിശ്ചയിച്ചിരിക്കുന്ന ‘ഉൾച്ചി ഫ്രീഡം ഷീൽഡ്’ സൈനികാഭ്യാസത്തെ ഉത്തരകൊറിയ കടുത്ത ഭാഷയിൽ വിമർശിച്ചതിനു തൊട്ടുപിന്നാലെയാണ് ട്രംപിന്റെ ഈ ശ്രദ്ധേയമായ പ്രസ്താവന. ഓഗസ്റ്റ് 17 മുതൽ ഓഗസ്റ്റ് 27 വരെ നടക്കാനിരിക്കുന്ന ഈ സംയുക്ത സൈനികാഭ്യാസം കൊറിയൻ ഉപദ്വീപിൽ വലിയ രീതിയിലുള്ള യുദ്ധഭീഷണിയും സംഘർഷങ്ങളും ഉണ്ടാക്കുമെന്ന് ഉത്തരകൊറിയ വിദേശകാര്യ മന്ത്രാലയം മുന്നറിയിപ്പ് നൽകിയിരുന്നു. ഇതിനിടെ കഴിഞ്ഞ ആഴ്ച ഉത്തരകൊറിയ വീണ്ടും ബാലിസ്റ്റിക് മിസൈൽ പരീക്ഷണം നടത്തുകയും ചെയ്തിരുന്നു.
ഡ്രോൺ ആക്രമണങ്ങൾ പ്രതിരോധിക്കൽ, ജി.പി.എസ് തടസ്സപ്പെടുത്തൽ നേരിടൽ, സൈബർ സുരക്ഷാ പരിശീലനങ്ങൾ തുടങ്ങിയ ആധുനിക യുദ്ധരീതികൾ മുൻനിർത്തിയാണ് അമേരിക്കയും ദക്ഷിണ കൊറിയയും സംയുക്ത പരിശീലനം സംഘടിപ്പിക്കുന്നത്. അമേരിക്ക തങ്ങളോട് ശത്രുതാപരമായ നിലപാട് തുടരുമ്പോഴും ഉത്തരകൊറിയൻ തലവനുമായി വ്യക്തിപരമായ നല്ല സൗഹൃദം നിലനിർത്താൻ കഴിയുന്നു എന്ന് ലോകത്തിന് കാണിച്ചുകൊടുക്കുകയാണ് ഈ പോസ്റ്റിലൂടെ ട്രംപ് ലക്ഷ്യമിടുന്നത്.
