കേരളത്തിലെ കനത്ത തിരഞ്ഞെടുപ്പ് തിരിച്ചടിക്ക് പിന്നാലെ പിണറായി വിജയനെതിരെ സിപിഎം പൊളിറ്റ് ബ്യൂറോയിൽ രൂക്ഷവിമർശനം. പിണറായി വിജയൻ ഇത്തവണ നിയമസഭാ തിരഞ്ഞെടുപ്പിൽ മത്സരിക്കേണ്ടതില്ലായിരുന്നുവെന്ന ഭൂരിപക്ഷ നിലപാടാണ് പിബിയിൽ ഉയർന്നത്. മുഖ്യമന്ത്രി പദവിയിൽ തുടർച്ചയായ പത്ത് വർഷം പൂർത്തിയാക്കിയ സാഹചര്യത്തിൽ മാറിനിൽക്കുന്നതായിരുന്നു ഉചിതമെന്ന വികാരം ബംഗാളിൽ നിന്നുള്ള നേതാക്കളും എ. വിജയരാഘവനും ഉൾപ്പെടെയുള്ളവർ പങ്കുവെച്ചു. എന്നാൽ, തിരഞ്ഞെടുപ്പ് തോൽവിക്ക് കാരണം ഭരണവിരുദ്ധ വികാരമല്ലെന്നും മറിച്ച് വർഗ്ഗശത്രുക്കൾ ഒന്നിച്ചതുകൊണ്ടാണെന്നുമുള്ള സ്ഥിരം ന്യായീകരണമാണ് പിണറായി വിജയനും സംസ്ഥാന സെക്രട്ടറി എം.വി. ഗോവിന്ദനും പിബിയിൽ ഉയർത്തിയത്. ഈ വാദത്തോട് ഭൂരിഭാഗം അംഗങ്ങളും യോജിച്ചില്ലെന്നാണ് ലഭിക്കുന്ന സൂചനകൾ.
പ്രതിപക്ഷ നേതാവിനെ തിരഞ്ഞെടുക്കുന്ന കാര്യത്തിൽ ഔദ്യോഗിക ചർച്ചകൾ നടന്നില്ലെങ്കിലും പി.എ. മുഹമ്മദ് റിയാസിനെ പരിഗണിക്കണമെന്ന നിർദ്ദേശം അനൗദ്യോഗിക ചർച്ചകളിൽ ഉയർന്നു. എന്നാൽ ഇതിനെതിരെ പിബിയിലെ യുവനേതാക്കളടക്കം കടുത്ത എതിർപ്പാണ് രേഖപ്പെടുത്തിയത്. തോൽവിക്ക് ശേഷവും കുടുംബവാഴ്ച തുടരുന്നു എന്ന ആരോപണത്തിന് ഇത് വളമിടുമെന്ന ആശങ്കയാണ് നേതാക്കൾ പങ്കുവെച്ചത്. സ്ഥാനാർത്ഥി നിർണ്ണയത്തിൽ വന്ന ഗുരുതരമായ പാളിച്ചകൾ തോൽവിയുടെ ആഴം വർദ്ധിപ്പിച്ചുവെന്ന് പിബി വിലയിരുത്തി. കെ.കെ. ശൈലജയെ മട്ടന്നൂരിൽ നിന്ന് പേരാവൂരിലേക്ക് മാറ്റിയത് പരാജയത്തിന് കാരണമായ വലിയ അബദ്ധമാണെന്നും, ജനപ്രീതിയുള്ള നേതാക്കളെ ദുർബലമായ സീറ്റുകളിലേക്ക് മാറ്റിയത് തിരിച്ചടിയായെന്നും വിമർശനമുയർന്നു.
ഭരണത്തിനെതിരെയുള്ള ജനവികാരം തിരിച്ചറിയുന്നതിൽ പാർട്ടിക്ക് വീഴ്ച പറ്റിയെന്ന് ബംഗാളിൽ നിന്നുള്ള പ്രതിനിധികൾ തുറന്നടിച്ചു. പിണറായി വിജയന്റെ ശൈലിയും ഭരണത്തിലെ അമിത കേന്ദ്രീകരണവും ജനങ്ങളെ അകറ്റിയെന്ന് പിബിയിലെ ചില അംഗങ്ങൾ നിരീക്ഷിച്ചു. എം.വി. ഗോവിന്ദൻ പ്രതിരോധിക്കാൻ ശ്രമിച്ചെങ്കിലും വടക്കൻ കേരളത്തിലെ ഉറച്ച കോട്ടകളിൽ പോലും ഉണ്ടായ വിള്ളൽ പാർട്ടിക്കുള്ളിലെ അതൃപ്തിയുടെ തെളിവായി നേതാക്കൾ ചൂണ്ടിക്കാട്ടി. തിരഞ്ഞെടുപ്പ് ഫലം വന്ന് ദിവസങ്ങൾ പിന്നിട്ടിട്ടും മുഖ്യമന്ത്രി പദം ഒഴിഞ്ഞതിന് പിന്നാലെ പ്രതിപക്ഷ നേതൃസ്ഥാനത്തെ ചൊല്ലി സിപിഎമ്മിൽ ഗ്രൂപ്പ് പോര് ശക്തമാകുകയാണ്. വരും ദിവസങ്ങളിൽ സംസ്ഥാന കമ്മിറ്റിയിൽ ഈ വിഷയങ്ങൾ വലിയ പൊട്ടിത്തെറികൾക്ക് വഴിവെക്കുമെന്നുറപ്പാണ്. പിണറായി യുഗത്തിന് ശേഷമുള്ള പാർട്ടിയുടെ ഭാവി സംബന്ധിച്ച് വലിയ ആശങ്കയിലാണ് അണികളും നേതാക്കളും.
