തിരുവനന്തപുരം: സംസ്ഥാനത്ത് സതീശൻ സർക്കാർ അധികാരത്തിലേറിയ ശേഷമുള്ള ആദ്യ നിർണായക ഉപതിരഞ്ഞെടുപ്പിൽ യുഡിഎഫിന് തിരിച്ചടി. സംസ്ഥാനത്തെ 38 തദ്ദേശ സ്വയംഭരണ വാർഡുകളിലേക്ക് നടന്ന ഉപതിരഞ്ഞെടുപ്പിൽ എൽഡിഎഫ് വ്യക്തമായ നേട്ടമുണ്ടാക്കിയപ്പോൾ, യുഡിഎഫിന് സിറ്റിംഗ് സീറ്റുകൾ നഷ്ടപ്പെടുകയും ഭൂരിപക്ഷത്തിൽ വലിയ ഇടിവ് സംഭവിക്കുകയും ചെയ്തു. തിരഞ്ഞെടുപ്പിന് മുൻപ് 22 സിറ്റിംഗ് സീറ്റുകളുണ്ടായിരുന്ന യുഡിഎഫ് 19 ലേക്ക് ചുരുങ്ങിയപ്പോൾ, 15 സീറ്റുകളിൽ പോരാട്ടത്തിനിറങ്ങിയ എൽഡിഎഫ് മുന്നേറ്റം നടത്തി 18 സീറ്റുകൾ സ്വന്തമാക്കി. എറണാകുളം ജില്ലയിലെ പൂതൃക്ക ഗ്രാമപഞ്ചായത്തിലെ കോലഞ്ചേരി ഈസ്റ്റ് വാർഡ് ട്വന്റി20 നിലനിർത്തി.
യുഡിഎഫിന്റെ കൈവശമിരുന്ന 7 പ്രധാന സീറ്റുകളാണ് എൽഡിഎഫ് ഘടകകക്ഷികൾ പിടിച്ചെടുത്തത്. അതേസമയം എൽഡിഎഫിന്റെ 4 സീറ്റുകൾ യുഡിഎഫും തിരിച്ചുപിടിച്ചു. തിരുവനന്തപുരം ജില്ലയിലെ ചിറയിൻകീഴ് നിയമസഭാ മണ്ഡലത്തിലെ കടുത്ത കോൺഗ്രസ് തമ്മിലടിയും കയ്യാങ്കളിയുമാണ് യുഡിഎഫിന് ഏറ്റവും വലിയ തിരിച്ചടിയായത്. രമ്യ ഹരിദാസ് എംഎൽഎ ഉൾപ്പെടെ വിവാദത്തിലായ പ്രാദേശിക പോരിന്റെ അനന്തരഫലമായി തിരുവനന്തപുരം ജില്ലാ പഞ്ചായത്തിലെ മംഗലപുരം മുണ്ടയ്ക്കൽ വാർഡ് 139 വോട്ടുകൾക്കും, അഞ്ചുതെങ്ങ് ബ്ലോക്ക് പഞ്ചായത്ത് വാർഡും എൽഡിഎഫ് വൻ ഭൂരിപക്ഷത്തിൽ പിടിച്ചെടുത്തു. ഇതോടെ മംഗലപുരം പഞ്ചായത്തിൽ എൽഡിഎഫിന് കേവല ഭൂരിപക്ഷത്തോടെ ഒറ്റയ്ക്ക് ഭരിക്കാനുള്ള വഴിയുമൊരുങ്ങി.
തിരഞ്ഞെടുപ്പ് നടന്ന ഭൂരിഭാഗം വാർഡുകളിലും യുഡിഎഫ് സ്ഥാനാർത്ഥികൾക്ക് ലഭിച്ച വോട്ടുകളിൽ വലിയ കുറവാണ് രേഖപ്പെടുത്തിയിരിക്കുന്നത്. കോൺഗ്രസിനുള്ളിലെ വിഭാഗീയതയും മുന്നണിക്കുള്ളിലെ വോട്ടുചോർച്ചയുമാണ് പല സിറ്റിംഗ് സീറ്റുകളും കൈവിടാൻ കാരണമായതെന്നാണ് പ്രാഥമിക വിലയിരുത്തൽ. സർക്കാരിന്റെ പ്രവർത്തന വിലയിരുത്തലായി മാറിയ ഉപതിരഞ്ഞെടുപ്പ് ഫലമാണിത്.
