ന്യൂഡൽഹി : രാജ്യത്ത് അടുത്തിടെയുണ്ടായ ട്രെയിൻ തീപിടുത്തങ്ങൾക്ക് പിന്നിൽ ആസൂത്രിതമായ അട്ടിമറിശ്രമങ്ങളാണെന്ന് സംശയിക്കുന്നതായി ഇന്ത്യൻ റെയിൽവേ. കഴിഞ്ഞ കുറച്ചു മാസങ്ങളായി രാജ്യത്തിന്റെ വിവിധ ഭാഗങ്ങളിൽ ഓടിക്കൊണ്ടിരിക്കുന്ന തീവണ്ടികളിലും റെയിൽവേ യാർഡുകളിലും അസാധാരണമായ രീതിയിൽ തീപിടുത്തങ്ങൾ റിപ്പോർട്ട് ചെയ്യപ്പെട്ടിരുന്നു. റെയിൽവേ സുരക്ഷാ വിഭാഗവും വിവിധ അന്വേഷണ ഏജൻസികളും നടത്തിയ പ്രാഥമിക വിലയിരുത്തലുകൾക്ക് പിന്നാലെയാണ് റെയിൽവേയുടെ ഈ റിപ്പോർട്ട്. കേവലം സാങ്കേതിക തകരാറുകളോ ഷോർട്ട് സർക്യൂട്ടോ മൂലം സംഭവിക്കാവുന്നതിലും അപ്പുറമാണ് ഈ അപകടങ്ങളുടെ സ്വഭാവമെന്നാണ് അന്വേഷണ സംഘത്തിന്റെ കണ്ടെത്തൽ.
പല സംഭവങ്ങളിലും തീപിടുത്തം ഉണ്ടായ കോച്ചുകളിൽ നിന്ന് കത്താൻ എളുപ്പമുള്ള ഇന്ധനങ്ങളുടെയോ രാസവസ്തുക്കളുടെയോ സാന്നിധ്യം കണ്ടെത്തിയിട്ടുണ്ട് എന്ന് അന്വേഷണ റിപ്പോർട്ട് സൂചിപ്പിക്കുന്നു. സർവീസ് അവസാനിപ്പിച്ച് നിർത്തിയിട്ടിരുന്ന ഒഴിഞ്ഞ കോച്ചുകൾക്ക് അർദ്ധരാത്രിയിൽ തീപിടിച്ച സംഭവങ്ങൾ കൃത്യമായ ആസൂത്രണത്തോടെയുള്ള അട്ടിമറിയാണെന്ന സംശയം ബലപ്പെടുത്തുന്നു. സംഭവങ്ങളുടെ പശ്ചാത്തലത്തിൽ രാജ്യത്തുടനീളമുള്ള റെയിൽവേ സ്റ്റേഷനുകളിലും ട്രാക്കുകളിലും സുരക്ഷ കർശനമാക്കാൻ റെയിൽവേ പ്രൊട്ടക്ഷൻ ഫോഴ്സിനും മറ്റ് സുരക്ഷാ വിഭാഗങ്ങൾക്കും നിർദ്ദേശം നൽകിയിട്ടുണ്ട്. രാജ്യത്തെ റെയിൽവേ സംവിധാനങ്ങളെ തകർക്കാനും ജനങ്ങളിൽ പരിഭ്രാന്തി സൃഷ്ടിക്കാനും ശ്രമിക്കുന്ന അട്ടിമറി ശക്തികളെ വെറുതെ വിടില്ലെന്ന് കേന്ദ്ര റെയിൽവേ മന്ത്രാലയം മുന്നറിയിപ്പ് നൽകി.
റെയിൽവേ യാർഡുകളിലും തീവണ്ടികൾ നിർത്തിയിടുന്ന ഇടങ്ങളിലും രാത്രികാലങ്ങളിൽ ആർ.പി.എഫ് പട്രോളിംഗ് വർദ്ധിപ്പിച്ചു. എല്ലാ പ്രധാന സ്റ്റേഷനുകളിലും കോച്ചുകളിലും സിസിടിവി നിരീക്ഷണം കൂടുതൽ ശക്തമാക്കും. കൂടാതെ യാത്രക്കാരുടെ ലഗേജുകൾ കർശനമായ സ്കാനിംഗിന് വിധേയമാക്കാനും, എളുപ്പത്തിൽ തീപിടിക്കുന്ന വസ്തുക്കൾ ട്രെയിനിൽ കൊണ്ടുപോകുന്നത് തടയാനും കർശന നിർദ്ദേശമുണ്ട്.
