ഐ.പി.എൽ 2026 സീസണിലെ ദയനീയ പരാജയത്തിന് പിന്നാലെ ചെന്നൈ സൂപ്പർ കിങ്സിൽ വലിയ മാറ്റങ്ങൾ ഉണ്ടാകുമെന്ന അഭ്യൂഹം ശക്തം. ഹാർദിക് പാണ്ഡ്യയുടെ ഇൻസ്റ്റാഗ്രാം സ്റ്റോറിക്ക് പിന്നാലെ, ആർ. അശ്വിന്റെ പുതിയ സോഷ്യൽ മീഡിയ പോസ്റ്റ് ക്രിക്കറ്റ് ലോകത്ത് വലിയ ചർച്ചകൾക്കാണ് തിരികൊളുത്തിയിരിക്കുന്നത്. ഹാർദിക് പാണ്ഡ്യ ചെന്നൈയിലേക്ക് ചേക്കേറുമോ എന്നാണ് ആരാധകർക്കിടയിലെ പ്രധാന ചോദ്യം.
മുംബൈ ഇന്ത്യൻസിന്റെ ക്യാപ്റ്റൻ സ്ഥാനത്ത് നിന്ന് ഹാർദിക് പാണ്ഡ്യ മാറുന്നുവെന്ന റിപ്പോർട്ടുകൾക്കിടെയാണ്, താരം തന്റെ ഇൻസ്റ്റാഗ്രാമിൽ “07:07” എന്ന ടൈംസ്റ്റാമ്പോടെ ഒരു സ്റ്റോറി പങ്കുവെച്ചത്. പിന്നാലെ ആർ. അശ്വിനും എക്സിൽ (X) “07:07” എന്ന് കുറിച്ചത് ആരാധകർക്കിടയിൽ ഹാർദിക് ചെന്നൈയിലേക്ക് എത്തുമെന്ന സൂചനയായി മാറിയിരിക്കുകയാണ്.
ശിവം ദൂബെയ്ക്കൊപ്പം മധ്യനിരയിൽ ഹാർദിക് പാണ്ഡ്യയെപ്പോലൊരു താരം വരുന്നത് ചെന്നൈയുടെ ബാറ്റിംഗിന് കരുത്ത് പകരുമെന്നാണ് അശ്വിന്റെ സൂചന. ടീമിൽ ബാലൻസ് കൊണ്ടുവരാൻ ബെൻ സ്റ്റോക്സിനെ ജെയിമി ഓവർട്ടനൊപ്പം ടീമിന്റെ ഭാഗം ആകുന്നതിനെക്കുറിച്ച് അശ്വിൻ ചർച്ച ചെയ്യുന്നുണ്ട്. കെ.കെ.ആർ ഒഴിവാക്കുകയാണെങ്കിൽ പതിരണയെ തിരിച്ചെത്തിക്കണമെന്ന ആരാധകന്റെ അഭിപ്രായത്തെയും അശ്വിൻ പിന്തുണയ്ക്കുന്നു.
ഐ.പി.എൽ 2026-ൽ ക്യാപ്റ്റനായും ഓൾറൗണ്ടറായും ഹാർദിക് പാണ്ഡ്യ വൻ പരാജയമായിരുന്നു. കളിച്ച 10 മത്സരങ്ങളിൽ നിന്ന് വെറും 206 റൺസും 4 വിക്കറ്റുകളും മാത്രമാണ് അദ്ദേഹത്തിന് നേടാനായത്. മുംബൈ ഇന്ത്യൻസിന്റെ ബാറ്റിംഗ് കോച്ച് കീറോൺ പൊള്ളാർഡ് പോലും ഹാർദിക്കിന്റെ ക്യാപ്റ്റൻസിയിലുള്ള അതൃപ്തി പരോക്ഷമായി സമ്മതിച്ചിട്ടുണ്ട്. “ഹാർദിക്കിനെ സംബന്ധിച്ചിടത്തോളം ഈ സീസൺ മികച്ചതായിരുന്നില്ല,” എന്നാണ് പൊള്ളാർഡ് പറഞ്ഞത്.
