ന്യൂഡൽഹി : വരാനിരിക്കുന്ന രാജ്യസഭ തിരഞ്ഞെടുപ്പിനുള്ള ഏഴ് സ്ഥാനാർത്ഥികളുടെ പട്ടിക പുറത്തിറക്കി കോൺഗ്രസ്. പാർട്ടി അധ്യക്ഷൻ മല്ലികാർജുൻ ഖാർഗെ, പാർട്ടിയുടെ മാധ്യമ-പ്രചാരണ വിഭാഗം തലവൻ പവൻ ഖേര എന്നിവർ കർണാടകയിൽ നിന്ന് മത്സരിക്കും. പ്രധാന ദേശീയ നേതാക്കളെയാണ് ഇത്തവണ കോൺഗ്രസ് രംഗത്തിറക്കിയിരിക്കുന്നത്.
എഐസിസി സെക്രട്ടറി മൻസൂർ അലി ഖാൻ ആണ് കർണാടകയിൽ നിന്നും മത്സരിക്കുന്ന മറ്റൊരു സ്ഥാനാർത്ഥി. കർണാടകയിൽ ഭരണത്തിലുള്ള കോൺഗ്രസിന് നിയമസഭയിലെ ഭൂരിപക്ഷം അനുസരിച്ച് നാലിൽ മൂന്ന് രാജ്യസഭാ സീറ്റുകളിൽ എളുപ്പത്തിൽ വിജയിക്കാൻ സാധിക്കും. ഈ സുരക്ഷിതത്വം മുൻനിർത്തിയാണ് ദേശീയ തലത്തിലെ പ്രമുഖ നേതാക്കളെ കർണാടകയിൽ നിന്ന് മത്സരിപ്പിക്കാൻ ഹൈക്കമാൻഡ് തീരുമാനിച്ചത്.
മുൻ ലോക്സഭാംഗം മീനാക്ഷി നടരാജൻ മധ്യപ്രദേശിൽ നിന്നും മത്സരിക്കും. തമിഴ്നാട്ടിൽ നിന്നും കോൺഗ്രസ് ഡാറ്റാ അനലിറ്റിക്സ് വിഭാഗം മേധാവി പ്രവീൺ ചക്രവർത്തി ആണ് മത്സരിക്കുന്നത്. രാജസ്ഥാനിൽ നിന്നും നിലവിലെ രാജ്യസഭാംഗമായ നീരജ് ദാംഗി വീണ്ടും മത്സരിക്കും. ജാർഖണ്ഡിൽ നിന്നും എഐസിസി സെക്രട്ടറി പ്രണവ് ഝാ മത്സരിക്കും.
