ഷിംല : ഹിമാചൽ പ്രദേശിലെ ചമ്പാ ജില്ലയിൽ ശക്തമായ ഭൂചലനം. റിക്ടർ സ്കെയിലിൽ 5.0 തീവ്രത രേഖപ്പെടുത്തിയ ഭൂചലനമാണ് വെള്ളിയാഴ്ച രാത്രിയോടെ അനുഭവപ്പെട്ടത്. ജൂൺ 5 ന് ഇന്ത്യൻ സമയം രാത്രി 10:04 ന് ആണ് ഭൂചലനമുണ്ടായത്. ചമ്പാ ജില്ലയ്ക്കും സമീപ പ്രദേശങ്ങൾക്കും പുറമെ സംസ്ഥാന തലസ്ഥാനമായ ഷിംലയിലും നേരിയ പ്രകമ്പനം അനുഭവപ്പെട്ടു. രാത്രിയിൽ അപ്രതീക്ഷിതമായി ഉണ്ടായ കുലുക്കത്തിൽ പരിഭ്രാന്തരായ ജനങ്ങൾ വീടുകളിൽ നിന്ന് തെരുവുകളിലേക്ക് ഓടിയിറങ്ങി.
ഭൂമിക്കടിയിൽ വെറും 5 കിലോമീറ്റർ മാത്രം ആഴത്തിലാണ് ഭൂചലനത്തിന്റെ പ്രഭവകേന്ദ്രം. ഭൂകമ്പത്തിന്റെ ആഴം കുറവായതിനാലാണ് പ്രകമ്പനം ശക്തമായി അനുഭവപ്പെട്ടതും ജനങ്ങൾക്കിടയിൽ വലിയ പരിഭ്രാന്തി പരത്തിയതും. ചമ്പയോട് ചേർന്നുകിടക്കുന്ന മറ്റ് മലയോര ജില്ലകളിലും ജമ്മു കശ്മീരിന്റെ അതിർത്തി പ്രദേശങ്ങളിലും ഇതിന്റെ പ്രകമ്പനം അനുഭവപ്പെട്ടു. ഭൂചലനത്തെ തുടർന്ന് ചമ്പാ ജില്ലാ ഭരണകൂടവും ദുരന്തനിവാരണ സേനയും സ്ഥിതിഗതികൾ വിലയിരുത്തി വരികയാണ്. മലയോര മേഖലകളിൽ മണ്ണിടിച്ചിലിനുള്ള സാധ്യത കണക്കിലെടുത്ത് ദുരന്തനിവാരണ വിഭാഗം അതീവ ജാഗ്രത പുലർത്തുന്നുണ്ട്.
