ലോകമെമ്പാടും പുരുഷന്മാരിൽ നാലാമതായും സ്ത്രീകളിൽ ഏഴാമതായും ഏറ്റവും കൂടുതൽ കണ്ടുവരുന്ന ഒന്നാണ് വയറ്റിലെ ക്യാൻസർ. തുടക്കത്തിൽ യാതൊരുവിധ ലക്ഷണങ്ങളും പ്രകടിപ്പിക്കാത്തതിനാൽ ഇതിനെ ‘സൈലന്റ് കില്ലർ’ എന്നാണ് ഡോക്ടർമാർ വിശേഷിപ്പിക്കുന്നത്. സാധാരണ ദഹനക്കേടായി കണ്ട് നമ്മൾ തള്ളിക്കളയുന്ന പല ലക്ഷണങ്ങളും ചിലപ്പോൾ വയറ്റിലെ ക്യാൻസറിന്റേതാകാം.
അസിഡിറ്റിയോ ഗ്യാസോ ആണെന്ന് കരുതി സാധാരണ എന്റാസിഡ് ഗുളികകൾ കഴിച്ച് സ്വയം ചികിത്സിക്കുന്നവർ ഈ ലക്ഷണങ്ങൾ പ്രത്യേകം ശ്രദ്ധിക്കണം. വയർ എപ്പോഴും വീർത്തിരിക്കുന്നത് പോലെ തോന്നുക, എപ്പോഴും ടൈറ്റ് ആയിരിക്കുക, പെട്ടെന്ന് ഭക്ഷണത്തോടുള്ള താല്പര്യം കുറയുക എന്നിവയാണ് ഇതിന്റെ ആദ്യ ലക്ഷണങ്ങൾ. എന്നാൽ വയറിന് വികസിക്കാൻ കഴിയുന്നത് കൊണ്ട് നമ്മൾ ഇത് സാധാരണ ദഹനക്കേടായി കരുതി അവഗണിക്കുന്നു. വേദനയില്ല എന്നത് രോഗം ഗുരുതരമല്ല എന്നതിന് തെളിവല്ലെന്ന് ഡോക്ടർമാർ മുന്നറിയിപ്പ് നൽകുന്നു.
താഴെ പറയുന്ന ലക്ഷണങ്ങളും അവഗണിക്കരുത്
*വയർ പൂർണ്ണമായി നിറഞ്ഞതായും ഇനി കഴിക്കാൻ പറ്റാത്തതായും തോന്നുക.
*മാറാത്ത നെഞ്ചെരിച്ചിൽ: സാധാരണ മരുന്നുകൾ കഴിച്ചിട്ടും വിട്ടുമാറാത്ത നെഞ്ചെരിച്ചിലും ദഹനക്കേടും.
*വയറുവേദന: വയറിന്റെ മുകൾഭാഗത്ത് വിട്ടുമാറാതെ നിൽക്കുന്ന നേരിയ വേദന. ഇത് ഏതെങ്കിലും പ്രത്യേക ഭക്ഷണം കഴിക്കുന്നത് കൊണ്ട് ഉണ്ടാകുന്നതാവില്ല.
*ശരീരഭാരം കുറയുക: ഡയറ്റോ വ്യായാമമോ ചെയ്യാതെ തന്നെ പെട്ടെന്ന് ശരീരഭാരം വൻതോതിൽ കുറയുക.
*കറുത്ത മലം: മലത്തിൽ രക്തത്തിന്റെ അംശം കാണുകയോ, മലം കറുത്ത നിറത്തിലോ ടാർ പോലെയോ കാണപ്പെടുകയോ ചെയ്യുക.
മുകളിൽ പറഞ്ഞ ലക്ഷണങ്ങളിൽ ഏതെങ്കിലും ഒന്നോ അതിലധികമോ രണ്ടാഴ്ചയിൽ കൂടുതൽ നീണ്ടുനിൽക്കുകയാണെങ്കിൽ ഒട്ടും സമയം കളയാതെ ഒരു ഡോക്ടറെ കണ്ട് പരിശോധന നടത്തണം. രോഗം കണ്ടെത്താനായി എൻഡോസ്കോപ്പി പരിശോധനയാണ് പ്രധാനമായും ചെയ്യുന്നത്. ക്യാമറ ഘടിപ്പിച്ച ചെറിയ ട്യൂബ് വയറ്റിലേക്ക് ഇറക്കി ഉള്ളിലെ തകരാറുകൾ പരിശോധിക്കുകയും സംശയമുള്ള ഭാഗത്തെ ചെറിയ കോശങ്ങൾ ബയോപ്സിക്കായി എടുക്കുകയും ചെയ്യും. ക്യാൻസർ സ്ഥിരീകരിച്ചാൽ അത് എത്രത്തോളം പടർന്നിട്ടുണ്ടെന്ന് അറിയാൻ സിടി സ്കാൻ, അൾട്രാസൗണ്ട് പരിശോധനകളും നടത്താറുണ്ട്.
