ടെക് ലോകത്തെ മുൻനിര ആർട്ടിഫിഷ്യൽ ഇന്റലിജൻസ് സേവനമായ ഗൂഗിളിന്റെ ‘ജെമിനി’ (Google Gemini) ആഗോളതലത്തിൽ തകരാറിലായതായി റിപ്പോർട്ട്. ബുധനാഴ്ച വൈകുന്നേരത്തോടെയാണ് ജെമിനിയുടെ സേവനങ്ങൾ രാജ്യത്തിനകത്തും പുറത്തും കൂട്ടത്തോടെ തടസ്സപ്പെട്ടത്. ജെമിനിയുടെ വെബ് പതിപ്പ് മാത്രമല്ല, ഗൂഗിൾ സെർച്ച്, ഗൂഗിൾ വർക്ക് സ്പേസ്, ഗൂഗിൾ വൺ, ഗൂഗിൾ ക്ലൗഡ് തുടങ്ങി ജെമിനി ഫീച്ചറുകൾ ഉൾപ്പെടുത്തിയിട്ടുള്ള ഗൂഗിളിന്റെ പ്രമുഖ സേവനങ്ങളെല്ലാം തന്നെ നിലച്ച മട്ടിലാണ്. ഉപയോക്താക്കൾക്ക് പുതിയ പ്രോംപ്റ്റുകൾ നൽകുമ്പോൾ ‘എറർ 1076’, ‘എറർ 1099’ തുടങ്ങിയ സന്ദേശങ്ങളാണ് സ്ക്രീനിൽ തെളിയുന്നത്.
ആഗോള ഔട്ടേജ് ട്രാക്കിംഗ് വെബ്സൈറ്റായ ഡൗൺ ഡിറ്റക്ടറിന്റെ (Downdetector) കണക്കുകൾ പ്രകാരം ബുധനാഴ്ച ഉച്ചയ്ക്ക് മൂന്ന് മണിയോടെയാണ് ജെമിനിയിൽ ആദ്യമായി തകരാറുകൾ റിപ്പോർട്ട് ചെയ്ത് തുടങ്ങിയത്. അഞ്ച് മണിയായപ്പോഴേക്കും പരാതിക്കാരുടെ എണ്ണത്തിൽ വൻ വർധനവാണ് രേഖപ്പെടുത്തിയത്. വെബ്സൈറ്റിലൂടെയും ആപ്ലിക്കേഷനിലൂടെയും ലോഗിൻ ചെയ്യാൻ ശ്രമിച്ചവർക്ക് ഒരുപോലെ സാങ്കേതിക തടസ്സം നേരിടേണ്ടി വന്നു. തങ്ങളുടെ ഇന്റർനെറ്റ് കണക്ഷൻ മികച്ചതായിരുന്നിട്ടും എഐ പ്ലാറ്റ്ഫോം പൂർണ്ണമായും പ്രതികരണമില്ലാത്ത അവസ്ഥയിലായെന്ന് നിരവധി ഉപയോക്താക്കൾ പ്രതികരിച്ചു.
ഗൂഗിൾ തങ്ങളുടെ ഏറ്റവും പുതിയ വിപ്ലവകരമായ മൾട്ടി മോഡൽ എഐ ആയ ‘ജെമിനി ഒംനി’ (Gemini Omni) ഔദ്യോഗികമായി അവതരിപ്പിച്ചതിന് ശേഷം ഇതാദ്യമായാണ് ഇത്രയും വലിയൊരു സാങ്കേതിക തകരാർ റിപ്പോർട്ട് ചെയ്യപ്പെടുന്നത്. ടെക്സ്റ്റ്, ഇമേജ്, ഓഡിയോ, വീഡിയോ എന്നിവ ഒരേസമയം കൈകാര്യം ചെയ്യാൻ ശേഷിയുള്ള ഈ പുതിയ അപ്ഡേഷന് പിന്നാലെയുണ്ടായ തകരാർ ഉപയോക്താക്കളെയും പ്രൊഫഷണലുകളെയും ഒരുപോലെ ആശങ്കയിലാക്കിയിട്ടുണ്ട്. തകരാറിനുള്ള യഥാർത്ഥ കാരണം എന്താണെന്ന് ഗൂഗിൾ ഇതുവരെ വ്യക്തമാക്കിയിട്ടില്ല. സെർവർ ഡൗൺ ആയതാണോ അതോ ബാക്ക് എൻഡ് അപ്ഡേഷനുകൾക്കിടയിൽ സംഭവിച്ച പിഴവാണോ ഇതിന് പിന്നിലെന്ന് കമ്പനി പരിശോധിച്ചുവരികയാണ്. സേവനം ഉടൻ തന്നെ പുനഃസ്ഥാപിക്കാനാകുമെന്നാണ് കമ്പനിയുമായി ബന്ധപ്പെട്ട കേന്ദ്രങ്ങൾ നൽകുന്ന സൂചന.
