ന്യൂഡൽഹി: ട്രെയിൻ ടിക്കറ്റുകൾ ബുക്ക് ചെയ്യുമ്പോൾ നേരിടുന്ന സാങ്കേതിക തടസ്സങ്ങൾക്കും ‘ക്യാപ്ച’ (CAPTCHA) വെരിഫിക്കേഷൻ മൂലമുണ്ടാകുന്ന ബുദ്ധിമുട്ടുകൾക്കും ശാശ്വത പരിഹാരമാകുന്നു. കോടിക്കണക്കിന് യാത്രക്കാർ ആശ്രയിക്കുന്ന ഐആർസിടിസി (IRCTC) വെബ്സൈറ്റ് അടുത്ത മാസം പകുതിയോടെ പൂർണ്ണമായും പുതുക്കിപ്പണിയും. ജൂലൈ 15-നകം അത്യാധുനിക സൗകര്യങ്ങളോടെയുള്ള പുതിയ വെബ്സൈറ്റ് യാഥാർത്ഥ്യമാക്കാൻ റെയിൽവേ മന്ത്രി അശ്വിനി വൈഷ്ണവ് ഉദ്യോഗസ്ഥർക്ക് കർശന നിർദ്ദേശം നൽകി. ജയ്പൂരിലെ മാളവ്യ നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ (MNIT) വിദ്യാർത്ഥികളുമായി നടത്തിയ ആശയവിനിമയ പരിപാടിക്കിടെ ഉയർന്ന പരാതിയിലാണ് മന്ത്രിയുടെ ഉടനടിയുള്ള നടപടി. സോഷ്യൽ മീഡിയയിൽ ഇതിന്റെ വീഡിയോ ഇതിനകം തന്നെ വൈറലായിക്കഴിഞ്ഞു.
തത്കാൽ സമയത്തും അല്ലാതെയും ടിക്കറ്റ് ബുക്ക് ചെയ്യുമ്പോൾ ഐആർസിടിസി പോർട്ടലിൽ നേരിടുന്ന കടുത്ത ലാഗിംഗിനെക്കുറിച്ചും, പ്രത്യേകിച്ച് ക്യാപ്ച കോഡുകൾ രേഖപ്പെടുത്തുമ്പോൾ ഉണ്ടാകുന്ന വലിയ താമസം കാരണം ടിക്കറ്റുകൾ നഷ്ടമാകുന്നതിനെക്കുറിച്ചും വിദ്യാർത്ഥികൾ മന്ത്രിയുടെ ശ്രദ്ധയിൽപ്പെടുത്തി. പരാതി കേട്ടയുടൻ തന്നെ വേദിയിൽ വെച്ച് റെയിൽവേയിലെ ഉന്നത ഉദ്യോഗസ്ഥനെ ഫോണിൽ ബന്ധപ്പെട്ട മന്ത്രി, വിദ്യാർത്ഥികളുടെ ആവശ്യം അറിയിക്കുകയും 30 ദിവസത്തിനകം പുതിയ വെബ്സൈറ്റ് സജ്ജമാക്കാൻ സാധിക്കുമോ എന്ന് ആരായുകയുമായിരുന്നു. തുടർന്ന് ജൂലൈ 15ഓടെ പുതിയ പ്ലാറ്റ്ഫോം ജനങ്ങളിലേക്ക് എത്തുമെന്ന് മന്ത്രി പ്രഖ്യാപിച്ചതോടെ വലിയ കയ്യടികളോടെയാണ് വിദ്യാർത്ഥികൾ ഈ തീരുമാനത്തെ വരവേറ്റത്.
നിലവിൽ രാജ്യത്തെ റെയിൽവേ ടിക്കറ്റ് ബുക്കിംഗിന്റെ 88 ശതമാനവും നടക്കുന്നത് ഡിജിറ്റൽ മാർഗ്ഗങ്ങളിലൂടെയാണ്. വ്യാജ അക്കൗണ്ടുകൾ തടയുന്നതിന്റെ ഭാഗമായി കഴിഞ്ഞ വർഷം ആധാർ അധിഷ്ഠിത വെരിഫിക്കേഷൻ നിർബന്ധമാക്കുകയും മൂന്ന് കോടിയോളം സംശയാസ്പദമായ അക്കൗണ്ടുകൾ റെയിൽവേ റദ്ദാക്കുകയും ചെയ്തിരുന്നു. ഈ നിയന്ത്രണങ്ങൾക്കിടയിലും സാധാരണക്കാരായ ഉപഭോക്താക്കൾക്ക് ബുക്കിംഗ് സുഗമമാക്കുക എന്ന ലക്ഷ്യത്തോടെയാണ് പുതിയ വെബ്സൈറ്റ് വരുന്നത്. കൂടുതൽ ലളിതമായ ഇന്റർഫേസ്, ഉയർന്ന വേഗത, നൂതന സാങ്കേതികവിദ്യ എന്നിവ പുതിയ പോർട്ടലിന്റെ പ്രത്യേകതയായിരിക്കുമെന്നും റെയിൽവേ വൃത്തങ്ങൾ വ്യക്തമാക്കുന്നു.
