ആഗോള പ്രതിരോധ രംഗത്ത് ഇന്ത്യൻ കരുത്ത് വിളിച്ചോതി പുതിയ അത്യാധുനിക ലൈറ്റ് കവചിത യുദ്ധവാഹനം ‘സിംഹ 4×4’ (Simha 4×4) ആഗോള വേദിയിൽ അവതരിപ്പിച്ചു. പ്രമുഖ ഇന്ത്യൻ മൾട്ടിനാഷണൽ കമ്പനിയായ ഭാരത് ഫോർജിന്റെ പ്രതിരോധ വിഭാഗമായ ‘കല്യാണി സ്ട്രാറ്റജിക് സിസ്റ്റംസ് ലിമിറ്റഡും’ (KSSL) പ്രമുഖ ആഗോള എയ്റോസ്പേസ്-ഡിഫൻസ് കമ്പനിയായ ‘പാരാമൗണ്ടും’ സംയുക്തമായാണ് ഈ അത്യാധുനിക മൾട്ടി പർപ്പസ് വാഹനം വികസിപ്പിച്ചത്. ലോകത്തിലെ ഏറ്റവും വലിയ കര-വ്യോമ പ്രതിരോധ സുരക്ഷാ പ്രദർശനമായ പാരീസിലെ ‘യൂറോസറ്ററി 2026’ (Eurosatory 2026) വേദിയിലാണ് സിംഹ 4×4 ഔദ്യോഗികമായി അനാവരണം ചെയ്തത്.
ഇന്ത്യ, ആഫ്രിക്ക, ദക്ഷിണേഷ്യ എന്നിവടങ്ങളിലെയും മറ്റ് ആഗോള വിപണികളിലെയും സായുധ സേനകളുടെ അതിവേഗം മാറിക്കൊണ്ടിരിക്കുന്ന ചലനക്ഷമതയും സുരക്ഷാ ആവശ്യങ്ങളും മുൻനിർത്തിയാണ് സിംഹ 4×4 രൂപകൽപ്പന ചെയ്തിരിക്കുന്നത്. നഗരയുദ്ധങ്ങൾക്കും (Urban Warfare) ദുർഘടമായ ഓഫ്-റോഡ് നിരീക്ഷണ ദൗത്യങ്ങൾക്കും ഒരുപോലെ ഉപയോഗിക്കാൻ സാധിക്കുന്ന തരത്തിലാണ് ഇതിന്റെ ഘടന. ഉയർന്ന കരുത്തും വേഗതയും ഒപ്പം മികച്ച സുരക്ഷയും ഉറപ്പുനൽകുന്ന ഈ വാഹനത്തിന്റെ മോഡുലാർ ആർക്കിടെക്ചർ കാരണം ആവശ്യാനുസരണം അപ്ഗ്രേഡ് ചെയ്യാനും മാറ്റങ്ങൾ വരുത്താനും ഉപയോക്താക്കൾക്ക് എളുപ്പത്തിൽ സാധിക്കുമെന്ന് കല്യാണി ഗ്രൂപ്പ് പ്രസ്താവനയിൽ വ്യക്തമാക്കി. അഡ്വാൻസ്ഡ് ഡിജിറ്റൽ പ്ലാറ്റ്ഫോമുകൾ ഉപയോഗിച്ച് കടുത്ത ഗുണനിലവാര പരിശോധനകൾ പൂർത്തിയാക്കി റെക്കോർഡ് വേഗത്തിലാണ് ഈ വാഹനം വികസിപ്പിച്ചെടുത്തത്.
ആഗോള വേദിയിൽ ഇന്ത്യയുടെ എഞ്ചിനീയറിംഗ്, പ്രതിരോധ വൈദഗ്ധ്യത്തിന്റെ ആഴം പ്രതിഫലിപ്പിക്കുന്നതാണ് സിംഹ 4×4 എന്ന് ഭാരത് ഫോർജ് വൈസ് ചെയർമാനും ജോയിന്റ് എംഡിയുമായ അമിത് കല്യാണി പറഞ്ഞു. നാറ്റോ (NATO) അംഗീകരിച്ച മാനദണ്ഡങ്ങൾക്കനുസൃതമായി നിർമ്മിച്ച ഈ ബഹുമുഖ പ്ലാറ്റ്ഫോം ലോകമെമ്പാടുമുള്ള പങ്കാളി രാജ്യങ്ങളിൽ അതിവേഗം വ്യാവസായിക അടിസ്ഥാനത്തിൽ നിർമ്മിക്കാൻ അനുയോജ്യമാണ്. ലോകത്തിലെ ഏറ്റവും മികച്ച പ്രതിരോധ ഉൽപന്നങ്ങളോട് കിടപിടിക്കാൻ ഇന്ത്യൻ പ്രതിരോധ വ്യവസായത്തിന് കഴിയുമെന്നതിന്റെ വ്യക്തമായ തെളിവാണ് ഇതെന്നും സായുധ സേനകൾക്ക് എവിടെയും തത്തുല്യമായ സംരക്ഷണവും ചലനക്ഷമതയും നൽകാൻ ഈ വാഹനത്തിന് സാധിക്കുമെന്നും അദ്ദേഹം കൂട്ടിച്ചേർത്തു. ‘മേയ്ക്ക് ഇൻ ഇന്ത്യ’ പദ്ധതിക്ക് കൂടുതൽ കരുത്തുപകരുന്ന ഈ അത്യാധുനിക യുദ്ധവാഹനം പ്രതിരോധ ലോകത്തും സോഷ്യൽ മീഡിയയിലും ഇപ്പോൾ വലിയ തരംഗമാണ് സൃഷ്ടിക്കുന്നത്.
