സോഷ്യൽ മീഡിയ പ്ലാറ്റ്‌ഫോമുകൾ വഴി നിരോധിത ഭീകരസംഘടനകളുമായും അന്താരാഷ്ട്ര ആയുധക്കടത്ത് സംഘങ്ങളുമായും ബന്ധം സ്ഥാപിച്ച സംഭവത്തിൽ മൂന്ന് പാകിസ്താൻ പൗരന്മാർ ഉൾപ്പെടെ ഏഴ് പേർക്കെതിരെ കർണാടക പൊലീസ് കേസ് രജിസ്റ്റർ ചെയ്തു. കേസുമായി ബന്ധപ്പെട്ട് കർണാടകയിലെ ബിദാർ ഭാൾക്കി താലൂക്കിലെ യേങ്കൂർ ഗ്രാമവാസിയായ വിശാൽകുമാർ വിജയ്കുമാർ മേത്രെ (24) എന്ന യുവാവിനെ പൊലീസ് അറസ്റ്റ് ചെയ്തു.
ബിദാർ ജില്ലയിലെ ഖതക് ചിഞ്ചോളി പോലീസ് സ്റ്റേഷനിലാണ് ഒക്ടോബർ ഒന്നിന് കേസ് രജിസ്റ്റർ ചെയ്തത്. പാകിസ്താൻ കേന്ദ്രീകരിച്ച് പ്രവർത്തിക്കുന്ന കുപ്രസിദ്ധ ഭീകരൻ ഷെഹ്‌സാദ് ഭട്ടി, റാണാ ഹുനൈൻ, നോമി ഖാൻ എന്നീ പാക് പൗരന്മാരെക്കൂടാതെ ഉത്തർപ്രദേശ് സ്വദേശി ആഷു ശർമ്മ, മധ്യപ്രദേശ് സ്വദേശി രാജ് ഭായ് എന്ന ലക്കി സിംഗ് എന്നിവരുൾപ്പെടെയുള്ളവരാണ് കേസിൽ പ്രതിപ്പട്ടികയിലുള്ളത്. ഇന്ത്യയുടെ പരമാധികാരത്തിനും ഐക്യത്തിനും ഭീഷണിയാകുന്ന രീതിയിൽ പ്രവർത്തിച്ചതിനും നിയമവിരുദ്ധമായി ആയുധങ്ങൾ കടത്താൻ ശ്രമിച്ചതിനുമാണ് ഇവർക്കെതിരെ കേസെടുത്തിരിക്കുന്നത്.
രഹസ്യ വിവരത്തിന്റെ അടിസ്ഥാനത്തിൽ ഒക്ടോബർ ഒന്നിന് പുലർച്ചെ പോലീസ് സംഘം നടത്തിയ മിന്നൽ പരിശോധനയിലാണ് വിശാൽ കുമാറിന്റെ വീട്ടിലെത്തി മൊബൈൽ ഫോൺ കസ്റ്റഡിയിലെടുത്തത്. ഫോൺ പരിശോധിച്ചപ്പോൾ, പാക് ഭീകരനായ ഷെഹ്‌സാദ് ഭട്ടിയുമായും അയാളുടെ അനുയായികളുമായും വാട്സാപ്പ്, ഇൻസ്റ്റഗ്രാം എന്നിവ വഴി നിരന്തരം ആശയവിനിമയം നടത്തിയതിന്റെയും അനധികൃത ആയുധക്കടത്ത് ചർച്ച ചെയ്തതിന്റെയും തെളിവുകൾ ലഭിച്ചു. ‘റഹേ ഹഖ്’, ‘റാണാ ഭായ് 333’ എന്നീ ഗ്രൂപ്പുകൾ വഴി ഇയാൾ രാജ്യവിരുദ്ധ ദൃശ്യങ്ങളും ഉള്ളടക്കങ്ങളും നിരന്തരം കണ്ടിരുന്നതായും അന്വേഷണ സംഘം കണ്ടെത്തി.
2025 ഡിസംബർ മുതൽ ഇയാൾ ഈ ഭീകര ശൃംഖലയുടെ ഭാഗമായി പ്രവർത്തിക്കുകയാണെന്നും സോഷ്യൽ മീഡിയ വഴി യുവാക്കളെ തീവ്രവാദ ആശയങ്ങളിലേക്ക് ആകർഷിക്കാനും ആയുധങ്ങൾ സംഘടിപ്പിക്കാനുമായിരുന്നു ശ്രമമെന്നും ബിദാർ എസ്.പി പ്രദീപ് ഗുന്തി അറിയിച്ചു. നിരോധിത ഭീകരവിരുദ്ധ നിയമമായ യു.എ.പി.എ (UAPA) സെക്ഷൻ 18, 20, 39 എന്നിവയ്ക്കൊപ്പം ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരവുമാണ് പ്രതികൾക്കെതിരെ കേസ് എടുത്തിട്ടുള്ളത്. പിടിയിലായ വിശാലിനെ ബെംഗളൂരുവിലെ പ്രത്യേക കോടതിയിൽ ഹാജരാക്കി റിമാൻഡ് ചെയ്തു. ഡിജിറ്റൽ തെളിവുകൾ പരിശോധിച്ച് സംഭവത്തിൽ കൂടുതൽ കേന്ദ്ര ഏജൻസികളുടെ സഹായത്തോടെ അന്വേഷണം പുരോഗമിക്കുകയാണ്.
